Adaptacion a wordo introduci recientemente den e ley cu ta regarda e seguro di malesa, caminda Banco di Seguro Social (SVb) a wordo ekipa cu instrumento legal pa bin cu mas control. E instrumento legal ta pa e doñonan di trabou cu no ta cumpliendo cu e obligacion cu nan tin cu nan trahadonan -segun nos ley di proteccion social- lo haya boet
E ley aki, segun director di SVb sr. Edwin Jacobs, lo drenta na vigor 1 di juli, pero multa no lo wordo aplica mesora. E implementacion di e instrumento legal aki den forma di multa lo tuma su tempo, asina director di SVb a declara na e matutino aki.
Implementacion di multa
Primeramente SVb mester percura pa nan empleadonan di control por sigui e curso corespondiente na polis extraordinario. Di e forma aki nan por haya e autoridad y conoce e leynan corespondiente pa nan por aplica esaki.
Otro aspecto cu SVB mester tene cuenta cun’e ta cu SVb mester bin cu un maneho pa loke ta e implementacion di e boet. Aworaki e multa ta stipula na maximo 500 mil florin. Sr. Jacobs ta aclaria cu no ta asina cu e prome multa lo ta 500 mil florin. P’esey ta importante pa bin cu un maneho cu ta stipula cu despues di tanto strike out bo ta haya e multa grandi ey.
SVb tin cu percura tambe pa bin cu un periodo di gracia caminda nan ta duna e doño di trabou e oportunidad pa nan cumpli cu ley. Pero despues di e periodo di gracia, SVb mester determina cu locual nan topa cu ta viola e ley di proteccion social, SVb tin cu boet nan conforme e instrumento legal cu nan a haya recientemente for diParlamento.
Ainda no tin un fecha fiho ki dia lo cuminsa pone multa. E empleadonan encarga cu control den SVb lo cuminsa un curso cu ta dura seis luna. E siguiente clase cu nan ta bay cuminsa ta na september, y SVb ta bay motiva nan coleganan pa manda 20 trahado. Unabes cu e curso aki termina prome cu maart 2017, SVb eventualmente lo cuminsa aplica e ley aki
SVb y Dimas
Sr. Jacobs a splica cu SVb ta bin informa nos comunidad caminda nan a mustra den medionan di prensa cu a base di intercambio di informacion cu Dimas, nan a bin constata un grupo grandi di persona cu ta haya permiso pa traha na Aruba, no ta keda sigura cerca SVb.
“Ta nifica cu un grupo grandi di personanan ta trahando sin wordo proteha”, el a bisa.
Tin dunadonan di trabou cu no ta cumpliendo cu proteccion legal pa loke ta trata proteccion social y laboral. Fei di april ultimo, SVb a cuminsa den un proceso di intercambio di informacion cu Dimas. Den e intercambio aki nan a constata cu un 35% di persona cu durante 2016 a pidi pa prolonga nan permiso di estadia y trabou, no ta registra cerca SVb.
“E ta un cifra hopi grandi”, ya cu pa ley nan mester ta sigura na SVb, asina cu suma preocupacion director di SVb a declara na Bon Dia Aruba.
Sinembargo e ta haya cu e instrumento actual cu SVb tin na nan disposicion, nan no por haci mucho cos pa contraresta e tendencia aki. Pero danki na e trabou conhunto cu nan ta bin desaroyando cu Dimas, e departamento aki ta eherce presion pa e doño di trabou bin sigura su trahado cerca SVb.
“Nos ta trahando tremendamente bon cu Dimas. Esaki ta dunando su bon resultado y nos ta bay ta cerando poco poco e buraco cu tabatin, ya cu no tabatin e cooperacion entre Dimas y SVb”, asina sr. Jacobs a bisa.
Falta di proteccion
Ademas di e situacion aki, SVb ta al tanto cu regularmente trahadonan cu no ta wordo permiti dor di e doño di trabou pa nan wordo sigura. E situacion aki ta pone cu e trahado no ta gosa di proteccion, apesar cu SVb ta informa e doñonan di trabou riba importancia di tene nan trahado sigura.
E informacion aki a yega Parlamento y e organo legislativo aki a considera necesario pa otorga SVb un instrumento cu ta bay mas leu cu e por uza pa asina “e por spanta”, y asina trahadonan cu mester ta sigura keda sigura cerca SVb.
E amienda of cambio di ley a tuma luga caba caminda a otorga SVb e derecho riba multa of boet. “Na momento cu nos ta constata cu un trahado ta na pia di trabou cu mester ta sigura y ta resulta cu no ta sigura, SVb por multa e doño di trabou.
“Nos ta kere sigur esaki lo yuda den percura pa cumplimento di e ley di seguro di malesa y seguro di accidente”, segun sr. Jacobs.
E director di SVb a relata na Bon Dia Aruba cu nan ta biba tur dia cu e situacion cu tin doño di trabou cu no ta percura pa e trahado haya espacio pa registra. Tambe nan tin e caso di trahado cu ta haya papel pa bin registra y pa negligencia di nan mes, no ta bin registra na SVb.
“Cierto momento no ta sano pa e persona mes. Te ora cu e ta haya un accidente na trabou of e ta haya un malesa, e ta bin ripara cu e no ta sigura, y cu por tin consecuencia pa e resto di su bida cu e tin cu carga su mes cun’e…”, el a indica.
