Tur gobierno den e trinta añanan cu Aruba ta trata goberna su mes, ta mustra un dado momento cierto cansancio y falta di boluntad pa dialoga. Esey ta specialmente e caso ora gobierno ta den di dos periodo sigui di gobernacion. Ta parce cu e portanan ta dal cera y e ministronan ta scucha solamente di esnan rond di nan y no ta dialoga cu resto di comunidad. Den e situacion actual nos ta mira esey atrobe. Mientras cu ora gobierno actual a drenta tabatin animo pa dialoga y a institui un consulta formal cu gremio y sindicato. Awor tur esey a disparce. Lo por bisa cu e actual dialogo entre ministro encarga cu turismo y AHATA ta muestra di disposicion di dialoga y ta desmenti loke nos ta bisa. Pero por mira esey di otro angulo: pakico no a dialoga cu e gremio aki, prome cu a elabora un cambio di ley practicamente den secreto, pa awor cu e proyecto di ley ta na parlamento caba, awor si ta desea di papia cu nan? Si no tabata pa e critica y presion fuerte di tur banda, probablemente esaki lo no a tuma luga tampoco.
Ademas hefe di gobierno, Prome Ministro a duna un declaracion caba, bisando cu e cambio di ley pa introduci un regimen di supervision riba acomodacion ‘all-inclusive’ ta bay sigui di tur manera, realmente cortando paso pa awe e ministro encarga lo por yega na un acuerdo cu e gremio, cu por hiba na un solucion balansa. E tono di Prome Ministro tabata di ‘papia kico cu boso kier, nos ta gobierno y lo bay dicidi’. E suceso aki no ta un fenomeno isola, pero tin mas incidente di e tipo aki cu ta mustra cu atrobe nos ta den e etapa final di un periodo di gobernacion, unda ta djis haci cos y despues pensa.
Kico opina di e hecho cu e ministro encarga cu implementacion di e ley riba siguridad (den empresa y institucion) a haya ta bon pa emiti un decreto ministerial (MB), basa riba articulo 3 di e ley menciona, unda ta dicidi cu di awor en adelante tur empresa y institucion cu tin mas di 10 empleado mester tin un responsabel di siguridad. Pakico? Pasobra gobierno ta ‘preocupa’ cu situacion di siguridad y ta bay haci algo al respecto. Tremendo, ta bon cu nan tambe finalmente a yega na realisa cu na pia di trabao na Aruba ta existi hopi situacion menos deseabel, cu ta exigi un intervencion di gobierno. Pero, ta ayera nan a cuminsa goberna? Si nos memoria no ta faya nos, e situacion aki tabata existi dia nan a drenta gobernacion caba. Y nan accionnan awor ta mustra cu apesar di seis aña di preparacion, ainda e ta resulta sopi pura… Ta bin sali na cla cu e famoso MB di e ministro no bal e papel cu e ta skirbi ariba. Pakico? Pasobra loke ministro ta pretende, por solamente a base di un cambio di ley. E ley te awe ta bisa cu cada empresa cu ta un ‘nijverheidsonderneming’ (industria) cu tin mas di 100 trahado, mester tin un responsabel pa siguridad, cu mester atende e inspectornan di gobierno cu ta responsabel pa supervision di e ley. Esey ta implica cu e ley manera e ta formula awor, no ta conta pa empresa cu no ta industria di cierto tamaño, solamente pa loke ta e designacion di e persona responsabel. Claro cu e otro stipulacionnan si ta conta pa tur empresa y institucion defini den e ley. Manera ta e caso cu tur tipo di supervision di cualkier ley na Aruba, e supervision di siguridad na pia di trabao ta un desastre. Anto kico nos sabionan ta haci, en bes di cuminsa drecha cos den cas pa por supervisa miho? Ta cuminsa cu saca locura legal cu no bal absolutamente nada y no tin ningun consecuencia legal pa ningun empresa o institucion. E pregunta cu ta surgi ta: no tin un alma den gobernacion cu ta tribi bisa e ministro concerni cu e ta actuando (atrobe) contra ley cu e decision aki.
E incidente aki no ta e unico ni e ultimo cu nos lo bay mira den e ultimo aña di e periodo di gobernacion aki. No lo tin dialogo oficial mas den sentido di consulta tripartiet pasobra gobierno desde 2014 no por trece e sindicatonan mas na mesa. Den nan afan pa ‘haci cos’, nos lo bay mira mas di e incidentenan aki, pasobra den pura no ta tuma tempo pa reflexiona y puntra esnan cu conoce e materia. Ademas cu e actitud di soberbia y arogancia a bira solamente pio den seis aña di gobernacion y lo no mehora tampoco den e tempo cu ta keda te eleccion otro aña. Mas y mas nos ta tende señalnan di hende den aparato gubernamental cu te awor a apoya e actual gobierno, pero awor tambe ya no ta pertenece na e ‘inner circle’ cu tin acceso ainda na e ministronan. Otro fenomeno cu ta ripiti su mes.
