Bon Dia tabata tin e placer di papia cu un hoben empresario Phil Joshua Hunt via di skype kende a splica un tiki tocante su experiencia manera empresario Arubiano den exterior y con awor e ta asina leu cu e ta cla pa yuda otro nan cu tambe ta desea di lanta nan mesun negoshi.
”Semper mi kier a tin mi mesun negoshi pasobra honestamente, mi nunca a gusta traha pa otro hende. Mi a haci cos den bida cu mi no kier bisa mi a faya aden, pero nan no a beneficia mi mucho specialmente den financia” , Hunt ta bisa Bon Dia.
Hunt ta agrega cu awo cu e ta biba na un otro pais, el a cuminsa traha su famia eynan y a yega un tempo cu mester a dicidi ki direccion e lo bay tuma atrobe den bida cu un otro comienso nobo su dilanti. ”Mi a dicidi cu mi kier tin mi mesun negoshi, pues mi a cuminsa busca con mi por haci esaki den un forma cu ami mes lo por como individual” , Hunt ta bisa.
Semper mester ta cla pa tuma iniciativa
”E prome iniciativa cu mi a tuma tabata pa persigui e conocemento di negoshi, investiga, studia, haya sa kico mi ta haciendo y haya e vision di con pa cuminsa y maneha un compania den un manera cu e ta bay ta exitoso” , Hunt ta splica. Hunt ta bisa cu trahando na hotel na Aruba e la haya hopi conocemento y siña hopi cos cu awo e ta adapta na su mesun compania. ”Trahando cu turista bo ta siña con pa trata hende bon, pues eynan mi ta gradici cu mi tin e base ey door di Aruba. Na Alemania, mi wowo nan a habri pa un mundo totalmente otro y duna mi un oportunidad nobo den bida. Cu mi ta den un otro pais, ningun hende no conoce mi, mi por tuma riesgo y haci fout pa siña di nan. Esaki a haci cu mi no tin miedo di faya mes mas, mi ta concentra den logra” , Hunt ta splica Bon Dia.
Dicon ta importante pa tin bo mesun negoshi?
Segun Sr. Hunt, ta depende kico bo kier den bida. ”Den mi caso, ami kier libertad, mi kier haci kico cu mi kier, bay unda cu mi kier sin cu placa ta un opcion y tur hende cu kier esey, unico opcion cu tin ta , pa traha pa bo mes” , Hunt ta bisa. Hunt ta splica cu si bo ta traha pa otro hende, bo no tin e libertad di tempo y semper bo ta mara na un salario pa motibo cu bo ta intercambia bo tempo pa placa.
Hunt ta splica cu e tin un mentor cu e ta bay bek na dje cu cada pregunta cu e tin anto cu e tambe ta maneha un negoshi Online cu ta aworaki hopi exitoso segun Hunt el a yega na miyones di ganashi caba. ”Fuera di esaki, keto bay mi a tuma curso con pa start un negoshi Online. Keto bay mi ta tumando curso nan pa siña mas pa no djis gana tanto pa luna pero cu mi por en berdad crea un fundeshi pa mi mes y bay den suma nan mas halto” Hunt ta bisa.
Sr. Hunt tin un producto cu ta actualmente birando hopi exitoso riba Amazon. Hunt Brothers Coffee ta su compania caminda e ta ofrece manera nan innovativo pa prepara bo koffie na unda cu bo ta. Pa sa mas tocante su producto bo por bishita e pagina di web http://www.huntbrothers.eu/
Hunt ta agrega cu actualmente e ta ocupa cu un curso cu e kier ofrece na esunnan cu tambe ta interesa di habri nan mesun negoshi online pero no sa con pa haci e. Pa mas informacion tocante e curso aki por tuma contacto cu Phil Joshua Hunt na +49 172 9330433 of e-mail: phil@huntbrothers.eu.
