Minister Otmar Oduber a indica cu ta existi e tendencia di mustra e tiendanan cu ta mustra nan frustracion, ya sea pa introduccion di parkeer meter maneha pa Aruparking. Tambe pa e tardansa den e trabou di renobacion di caya y/of cu turista no ta haciendo debido uzo di e tram, ya cu nan no ta baha pa haci compras.
E mandatario ta haya cu ta existi un diferencia di opinion entre e comerciantenan di caya grandi mes, pasobra mientras cu otro ta critica, tambe tin otronan cu si ta wak e beneficionan di pa ehempel Aruparking. Te hasta nan tin programa cu nan ta paga e clientenan nan pago di parkeer.
Sinembargo e mandatario ta kere cu comercio mes mester bin cu un plan pa atrae y percura cu e turistanan keda haci compras. E ta bisa cu e prome mita di caya grandi e problema ta menos cu e di dos parti. El a indica cu esaki ta un tendencia, no di awor, sino di hopi aña pasa, te hasta na epoca cu e tabata un mucha. Esaki no kiermen cu nan kier cera wowo pa e echo aki, segun minister Oduber.
Aruparking
Minister Oduber a declara cu el a pidi Aruparking pa bin e siman aki cu e estudio cu nan a haci via un compania priva. E ta un estudio amplio cu tur hende te hasta bishitantenan a participa den dje. Igualmente Camara di Comercio (KvK) a realisa un encuesta den 60 tienda y cu nan trahadonan tambe.
Minister Oduber kier analisa y discuti riba e estudio aki hunto cu KvK. E mandatario a bisa cu ta bon pa mira e desaroyo durante e ultimo 7 lunanan cu e sistema di cobra pa parkeer a wordo introduci. Si pueblo ta aceptando of no e sistema di Aruparking, ya cu a base di cifra Aruparking mester prueba cuanto presencia di hende tin den e area di centro di ciudad. Ya cu mayoria di banco tin nan propio luga di parkeer, pues e hendenan cu ta haci uzo di Aruparking ta pasobra nan ta bin haci compra of otro tipo di actividad den centro di ciudad.
“Por ta e hendenan ta biniendo, pero no tin e producto cu nan ta buscando of no tin e servicio cu nan ta desea…”, segun e mandatario. P’esey e ta considera relevante pa bin cu un midimento aki pa asina tin e informacion necesario. E cifra aki lo por determina entre otro si mester habri e caya bek of converti caya na loke e tabata 15 aña pasa.
El a haci enfasis riba e necesidad di e productonan y servicio cu e pueblo y e turistanan di awe ta buscando. Un punto cu el a trece dilanti ta e orario di ceramento di e tiendanan. Ya cu mayoria di tienda no ta habri despues di 7’or atardi, ya cu esaki ta e motibo pakico Aruparking a pone su orario te cu 7’or anochi. “Nos kier fomenta pa e hendenan habri despues di 7’or”, el a bisa.
E mandatario a laga sa cu nan a papia hopi biaha cu KvK y tiendanan den centro di ciudad, fei di cu nan a cuminsa cu e proyecto pa bin cu e shopping nite. “Mi ta kere cu mester cambia un poco e forma di haci negoshi…”, el a bisa.
