Minister Otmar Oduber a reaccion riba e diferente preocupacion cu a bini tanto di e sector di oposicion, pero tambe di comercio mes y sindicato riba e caida di actividad comercial den caya grandi.
“Preocupacion nos tur tin. Naturalmente nos kier haci lo maximo cu ta posibel y gobierno na su turno ta haciendo lo maximo pa mehora e comercio den caya grandi”, asina e mandatario encarga cu turismo a bisa.
Segun e mandatario e inversion cu a wordo haci pa reactiva caya grandi y su alrededor tabata miyonario, aunke el a tarda mas pa bin cla di loke tabata plania. Sinembargo awendia nos tin “un joya di caya grandi, el a bisa.
E ta kere cu e preocupacion cu ta existi ainda riba caya grandi ta demanda un combinacion di esfuerso y no papia los for di otro. E ta kere cu esaki ta e clave di exito pa caya grandi. “Tanten cu nos ta sigui papia los for di otro y cada un ta duna su opinion sin cu tin un plan poni riba mesa, mi no ta kere cu nos no ta bay logra mucho”, el a bisa.
El a bisa cu gobierno a haci un gran inversion, pero cierto momento mester sinta pa bin cu un plan cu comercio den caya grandi entre nan promocion y actividad pa atrae hende.
Den pasado nan a yega di pone fondo disponibel traves di TPEF (Tourism Product Enhancement Fonds) di ATA cu a crea un anochi di compras. Nan a crea full un ambiente cu musica y propaganda. Pero e ta haya cu un factor cu por hunga un rol ta cu e union den caya no t’ey. Ya cu lamentablemente apenas 7 pa 8 tienda a habri nan porta te anochi e tempo ey.
