1jun, NW, bernabela kia (1).JPG

Ayera mainta e trahadonan di Korrectie Instituut Aruba (KIA) pa un rato a drenta den accion. E sindicato Trahadonan Organisa di Sector Publico di Aruba (TOPA), kende ta representa algun trahado di KIA tabata presente pa asina sostene su miembronan.

 

E trahadonan no ta contento cu e situacion di maneho cu nan ta hayando na e momentonan aki na KIA. Dos trahado di KIA a wordo geschors y no mag yega pia di trabou. Esaki a pone cu nan a drenta den accion un rato. Sindicato TOPA kier sa kico ta e motibo cu a schors e trahadonan y pakico a duna nan opcion pa wordo traslada pa un otro departamento. E trahadonan ta geschors y no a wordo kita for di trabou.

 

Sr. Rene Bernabela, president di sindicato TOPA a indica na Bon Dia Aruba cu e trahadonan a drenta den accion pa mustra nan mal contento cu e trato di parti di maneho di KIA. “E no ta esun corecto.” Mirando e echo cu dos di e trahadonan cu tabata envolvi den e caso di maltrato algun tempo pasa, na e momentonan aki,  despues cu nan tabata tin basta tempo trahando, despues di a haya nan castigo cual ta trabou den comunidad cu a wordo eherce caba, pero diripiente di parti di gobierno e dos personanan aki un biaha mas ta wordo geschors.

 

Desacuerdo

“Nos como parti di sindicato TOPA ta den un desacuerdo totalmente riba esey. No solamente cu nan a haya schorsmento, pero e propio Maneho di KIA ta duna di conoce na ambos personanan na e momentonan aki, cu e trahadonan tabata tin un tempo geschors, nan tabata trahando riba dje ya pa dos aña. Diripiente aworaki ta schors ambos atrobe,” el a sigui bisa Bon Dia Aruba. Den e caso aki di schorsmento nan ta wordo notifica riba e posibilidad si nan ta desea di bay traha na un otro departamento di gobierno, den e caso aki Cuerpo Especial Arubano (CEA).

 

Inaceptabel

“Mi kiermen esaki ta algo inaceptabel. Pasobra despues cu bo a laga nan como dirigente di KIA, traha pa dos aña den instituto di KIA na e momentonan aki” segun sr. Bernabela. Despues cu nan a eherce castigo den comunidad, anto awor diripiente e trahadonan ta wordo geschors un biaha mas. E biaha aki nan ta wordo geschors sin un motibo cla defini, segun e president di sindicato TOPA. “Nos ta bisa cu ariba dje cu bo ta ofrece nan un traslado pa nan bay otro departamento, nos no ta compronde mas. Cua ta e motibo di e castigonan aki cu a bolbe presenta y kico ta e hustificacion di e castigonan aki,” e president di TOPA a indica na Bon Dia Aruba.

 

Proceso ta andando

A puntra sr. Bernabela si e tabata referi riba e situacion di schorsmento of si e hendenan a wordo retira di trabou. El a bisa, cu na e momentonan ey ta papia riba schorsmento pasobra e parti di retiro ainda no a tuma luga. E proceso ta andando, unda cu no por papia di retiro ainda. “Bo tin cuater trahado sinta na cas  y awor bo ta bin ripara esaki. No por ta posibel cu bo tin cuater sinta na cas anto dos bo a laga bin traha be. Esaki ta un fout di parti di Minister di Husticia. Den e caso aki cu e fout den e procedura cu nan a comete, awor e dos trahadonan aki no por bay carga culpa pa cu esaki. Ta maneho di KIA a comete un eror atrobe”.