Sindicalista sr. Hubert Dirksz den nomber di FTA ta lamenta cu na momento cu nan a bin cu un critica contra gobierno su medida di cobra pa e servicio di recogemento di sushi pa medio di e compania estatal Serlimar, e no a cay den bon tera cerca nan.
“No ta sin mas nos ta critica esey. Nos ta kere cu den comunidad tin hende di menos recurso…”, el a bisa. FTA sa cu sin duda Serlimar tin derecho di existencia, y e compania mester di entrada pa por draai. Pero pa FTA no tabata necesario pa gobierno na prome luga “impone” un tarifa, sin cu e ta social. E sindicato ta haya cu e suma cu kier cobra ta di mas.
“Nos a exigi y pidi gobierno pa bini cu un tarifa social. Nos a wordo priminti esey y nunca e tarifa social ta yega”, asina cu hopi indignacion presidente di FTA a bisa.
E ta haya “un biaha mas” cu e ta un falta di respet. E ta considera e echo aki lamentabel, ya cu mientras sindicato ta grita… un gran parti di nos comunidad no ta worry. “Nos sa cu e situacion social ta bay mas atras y mas malo dia pa dia”, segun e sindicalista.
FTA ta considera cu ta urgente y necesario pa un censo tuma luga. Di e forma aki nos por haya un bista di e situacion di berdad y midi e nivel di pobresa cu tin na Aruba. “Nos tin cu midi e cantidad di hende desemplea… nos tin cu midi e cantidad di mucha cu no ta bayendo scol cu ta bou di 18 aña”, el a bisa,
Nan ta situacion –segun presidente di FTA- cu ta rekeri atencion di cada un di nos. El a bisa cu ta bon pa sa cuanto hende ta sin coriente y sin awa y cu ta biba asina ariba nos pais. “Nos no por djis laga e situacion bay. P’esey mes nos ta kere cu tarifa social mester a bini pa recoge sushi”, el a declara na Bon Dia Aruba.
