Paul Gielen ta Gerente general di Renaissance y sigur e tin su comentarionan pa un futuro ley pa regulacion di All Inclusive. Renaisssance no ta all inclusive, pero si ta interesante pa sa nan posicion como hotel, si e ley pasa, con bon e lo ta pa nan y ki efecto negativo e lo tin pa nan y con hopi nan mes ta envolvi den esaki.
Gielen a splica cu nan ta bende pakete cu tin all inclusive den dje. Tin ora e necesidad ta halto, nan ta bende mas y e ora no tin necesidad pa bende, pasobra tin hopi demanda, manera un Christmas Experience, no ta bende all inclusive. Por ehempel den e prome tres lunanan cu ta high season na Aruba, a bende all inclusive y segun Gielen, den total tabata mas of menos 20% di e total business cu nan tabata tin, tabata all inclusive.
A cera mid seventies. Imagina si no a bende all inclusive, den high season lo a bende 55% di ocupacion. E hotel no ta sobrevivi asina ey. Awe mas y mas ta wak cu hende ta pidi pe y ta dun’e. Un hotel no ta camber so. Un hotel ta restaurant, bar, show, banda, theme nights. Ta un pakete e ta. Ta un experiencia completo.
Gielen a splica cu e no ta kere cu den futuro e hotel lo ta un all inclusive, pero si un hende pidi, cu e ta paga su cuminda y bebida adelanta. E tin un presupuesto, ta ofrece e pakete ey y e unico cos cu e ta haci, en bes cu ta paga eynan, ta paga adelanta. E ora ta yam’e all inclusive. Basicamente ta gewoon huespednan cu ta come y bebe cerca nan y hopi biaha ta wak esey, pasobra tin tur dos banda, ta bay marketplace, nan ta come, nan ta bay starbucks, cu tur cos cu ta den cercania, nan ta come eynan tambe.
Gielen a agrega cu e ta compronde cu kier regula all inclusive y ta compronde cu tin un cierto miedo caminda cu hende ta haya cu diripiente ta haya full e strip ta all inclusive so, pasobra e lo afecta cierto hendenan. E cos cu no ta di acuerdo cun’e, cu ta uza un ley manera esaki pa regula all inclusive. Gobierno na mester bisa e hotelnan kico nan mag y no mag di bende. Proximo biaha nan por bisa cu tin hopi restaurant cu ta bendiendo desayuno. No kier pa inclui desayuno mas.
Tur prijsnan pa “corperate”, cu personal di avion, tur tin desayuno den dje. No por laga gobierno dicidi si mag of no mag inclui den bo prijs, e no ta klop. Esey ta e principio di e cos aki. E miedo cu tin cu ta gobierno ta bay dicta kico hotelnan mag di haci. Con pa atende, ki pakete ta ofrece, ki entretenimento ta pone den bar, etc. Esey ta e problema. Esaki sigur tin su consecuencianan.
Den e caso di Renaissance, nan tin 25% den all inclusive. Si wak e “all inclusive revenues”, e ta un poco mas halto, pasobra nan ta come mas cu un EP. Ta sigur cu Renaissance, manera e ta set up, e ta set up a base di esey, un poco di all inclusive y hopi EP. Si mañan no por bende e “all inclusive” mas e ora mester baha den gasto of corta. Hasta cera un restaurant mes, pasobra pakico tin tanto restaurant e ora. Por ta cu EP por lora cu un of dos restaurant so. Awo ta duna e escogencia. Hende por bay cas te hasta cu consecuencia di e ley manera cu esaki ta, Gielen a splica.
