Den pasado e hefenan di Cuerpo di Bombero tabata organisa cursonan pa bomberonan ta bon prepara pa asina brinda servicio na comunidad. Pero pa motibo cu ainda tin caminda cu falta cierto herment pa por traha mas eficiente nan a bin cu e iniciativa pa mehora algun di e areanan aki. E biaha aki nan mes no a organisa cursonan pa bomberonan, sino nan a acerca Enseñansa pa Empleo pa asina handle e cursonan tanto pa e werksternan como e bomberonan cu ta traha den Alarma Central (AC).
Comandante Edward de Cuba a bisa Bon Dia Aruba cu den nan concepto e momento ey tabata suficiente pa cu e persona tin un preparacion completo pa su trabou. Pero den e ultimo añanan nan a ripara cu comunidad a desaroya, tur rond a desaroya cu medionan social. Esaki a pone cu nan a ripara cu e curso interno ta cubri mayoria di e parti, pero asina mes ta keda cierto parti cu e trahadonan tin mester di extra herment pa e por haci e trabou mas eficiente y mas eficaz.
Esey a pone cu e comandante a sinta prome cu e staf interno di Cuerpo di Bombero. Aki nan a ripara cu mester di algo, nan mester bay dilanti. “Anto nos a comunica cu Enseñansa pa Empleo na e momento ey,” el a bisa. “Nan tabata tin un curso di comunicacion. Pero nos a ripara cu e ta hopi basico pa locual nos mester. Nos a sinta cu nan y desaroya for di nan formacion di estudio cu nan tin y loke nos ta ofrece nos trahadonan, nos a traha un curso comunicacion di operador.”
E operadornan di Alarma Central lo haya algo mas specifico cu ta amplia e trabou cu nan haci riba nan mes na Brandweer. “Un ehempel ta no djis tuma un aviso, tal cos a pasa, tal caminda e ta y e unidad sea di ambulance of di Brandweer, pero purba di compronde tambe di unda e persona ta biniendo cu su preocupacionnan, den ki situacion e ta na e momentonan eynan. No solamente e situacion di stress, pero dicon e tin stress, pakico y kico mi por haci cun’e en bes di djis bis’e calma bo pero kico mi por bis’e, mi tono di bos y con mi ta anda cun’e, calma e persona pa asina mi por haya informacion mas miho na e momentonan ey.”
Hunto cu e bomberonan y werksternan, e trahadonan di ambulance tambe a participa na e curso aki. E empleadonan cu a bin di Ambulance pa traha cu Cuerpo di Bombero, ta yuda den e parti di Alarma Central unda cu nan ta yuda cubri cu tur e trabounan cu Cuerpo di Bombero ta atende cun’e. “Nos ta atende ambulance y brandweer.”
Pa e parti di e werksternan, normalmente den e werkster ta drenta den servicio como werkster y eynan e ta keda. “Nos kier a duna nan e oportunidad tambe pa desaroya y sigui crece den organisacion. Esaki ta un paso mas aleu di telefonista y recepcionista. Mi tin cu bisa nan a bay hopi bon den e curso. Tambe nan tur a haal esaki.”
Awo nan por cuminsa ripara e diferencia. Pasobra hopi yamada cu ta drenta via Alarma Central y cu ta destina pa oficina, nan a dicidi di separa esaki ta kita un peso di trabou di e centralista. Esaki ta pone cu e yamada ta bay directamente pa e recepcionista/telefonista. E atencion pa e cliente di brandweer ta mas dirigi riba otro departamento manera departamento di prevencion, estudio y tur esey lo haya mas atencion na e momento eynan cu locual nan ta haya den Alarma Central.
