Ayera fraccion di MEP a pidi un reunion publico na presidente di parlamento pa trata e asunto di tarifa pa servicio di recogemento di desperdicio domestico cu gobierno a introduci entrante 1 di juli.

Nan ta considera importante pa bin cu un reunion publico na corto plaso, ya cu e topico aki a causa conmocion den comunidad. Nan kier debati tur aspecto rond di e decision aki cu minister di Medio Ambiente, Otmar Oduber den parlamento.

No tin claridad

Lider di e fraccion, Rocco Tjon a bisa cu nan a tuma e decision aki despues di analisa e tipo di contesta cu nan a ricibi fei minister en cuestion riba nan pregunta rond di e decision sorpresa di cuminsa cobra practicamente di un dia pa otro riba e servicio aki. “Enbes cu e contesta ta trece claridad pa loke ta e cobramento di recoge sushi, el a trece mas pregunta”, segun parlamentario Tjon.

Na prome instante ora parlamentario Tjon a lesa e contesta riba e carta cu el a manda na e mandatario, el a kere cu tabata un contesta di CAft, ora el a wak su contenido. E ta ripara cu esun cu a formula e contenido di e carta no ta altura riba con nos estado di derecho ta funciona. Te hasta e ta haya cu e carta cu nan a ricibi como contesta, e mandatario ta contradeci su mes.

Un punto tin di haber ora cu nan ta puntra e mandatario pa manda nan e maneho den cual e decision aki ta wordo basa. Sinembargo e mandatario ta bisa cu no ta pa medio di un maneho sino cu ta trata di un ley. Pero ora cu e mandatario ta manda e documento, e ta referi na un nota di maneho cu ta e programa di gobernacion.

Parlamentario Tjon a indica cu den e programa di gobernacion niun caminda ta para cu ta bay cobra pa recoge sushi. E ta aclaria cu cobramento mes no ta e punto di discusion. Tampoco riba con nos por yega na un maneho di desperdicio eficiente.

Sinembargo durante e tratamento di presupuesto 2018 como fraccion nan a aproba e alocacion di fondo adicional pa Serlimar por draai durante e aña fiscal aki. Parlamentario Tjon ta haya cu esaki ta e punto cardinal. Pa tal motibo nan a manda e carta diabierna ultimo pa e mandatario, unda nan a haci nan preguntanan.

5.4 miyon extra presupuesta pa Serlimar

El a reitera cu pa loke ta trata 2018 durante e tratamento di e presupuesto cu ta consisti un parti riba e maneho di e minister di medio ambiente ta wordo splica bon cla cu tin discusionnan andando ainda cu diferente grupo si ta bay cobra of no. Esaki tabata un motibo -segun e lider di fraccion di MEP- cu debi cu e 16 miyon cu a wordo presupuesta pa Serlimar no tabata suficiente, nan a aproba 5.4 miyon florin extra.

Tur e placa aki ta pa Serlimar por cumpli cu e tarea di piki sushi y zorg cu e gastonan cu esaki ta demanda por wordo cubri debidamente. Parlamentario Tjon ta haya cu no ta hustifica pa cuminsa cobra aworaki fei 1 di juli ultimo, ya cu parlamento a aproba fondonan necesario pa esaki wordo cubri pa 2018 caba. E ta lamenta cu djis e tipo di preguntanan aki cu nan a formula den nan carta, no a haya contesta fei e mandatario.

Ley hinca den otro contexto

Otro aspecto cu merece discusion y aclaracion tin di haber cu e ley mes. Segun e mandatario di medio ambiente cada vivienda mester paga Serlimar obligatoriamente pa nan servicio, ya cu esaki ta para den ley. Parlamentario Tjon a indica cu ta wordo referi na e ley aki, pero ora bo ta lesa e memorie vantoelichting di e ley, e ‘no ta papia cu solamente Serlimar por cobra pa e recogemento di sushi’.

E legislado a bisa cu e ley ta papia bon cla cu e ley no por exclui companianan particular pa haci e tarea of trabou aki. E mesun ley ta duna e base huridico pa e mandatario por fiha su maneho riba dje. E ta haya cu na final e decision aki tin di haber cu maneho. “Si no ta asina anto e mandatario no ta wordo referi den su contesta riba nota di maneho”, e di. Ademas e mandatario no por bin bisa cu e decision aki no ta maneho, pasobra a wordo bisa den su carta cu ‘e ta un decision tuma pa full conseho di minister’, y no di e mandatario so. P’esey e ta kere cu e mandatario en cuestion no a lesa full e contenido di su carta.

Estado di derecho

Ta existi un separacion den cuadro di estado di derecho unda gobierno ta stimula y ehecuta e maneho cu kier hiba. Pero di su banda parlamento mester aproba y controla e maneho aki.

“Esaki ta principionan cu semper tin cu prevalece riba cualkier maneho”, e di. Ora cu nan ta ripara cu den nan concepto e gobierno di coalicion a desvia di locual a presenta durante tratamento di presupuesto, nan por bin cu cuestionamento ya cu esaki ta parti di nan funcion. Tambe nan ta aproba, pero nan por desaproba decisionnan riba gobierno su maneho tambe, manera nan a haci den nan carta di diabierna ultimo dirigi na e mandatario di medio ambiente.

Den su concepto parlamentario Tjon a bisa cu nan ta cumpliendo cu nan trabou y nan a haci nan preguntanan. Esey ta loke a sosode aworaki. E ta kere cu unabes cu tin claridad riba e debate cu bay tin den e reunion publico, nan por fiha un posicion. Esta si nan ta aproba of desaproba e decision di e mandatario en cuestion.

Nan no a haya di antemano niun informacion riba e decision aki di e mandatario riba introduccion di tarifa y cobramento di servicio obligatorio di Serlimar. Nan kier bin cu e debate aki pa haya mas claridad, esaki independiente cu ta existi un gobierno di coalicion (MEP-POR-RED).

Pa lider di fraccion di MEP, sr. Tjon, esaki ta e principio cu semper mester a prevalece riba cualkier maneho of ‘cualkier kier’ di un mandatario. E ta argumenta cu mal funcionamento di parlamento a haci cu e gobierno anterior a hiba un ‘maneho desastroso’.