Diabierna dia 27 di mei ultimo Minister di Enseñansa Michelle Hooyboer-Winklaar a aproba e normanan di admision oficial pa ciclo basico HAVO/VWO pa aña 2016-2017, esta pa e scolnan Colegio Arubano y Colegio San Nicolas. Esaki a sosode despues cu e comision pa conseha Minister riba e normanan di admision a tene nan ultimo reunion y votacion diabierna mainta. A base di esaki e comision a formula y manda nan conseho pa Minister y e titular di enseñansa a aproba esaki conforme e proposicion di e comision.
Inspecteur General di Enseñansa ta encabesa e comision hunto cu representacion di Departamento di Enseñansa, SMOA cu ta maneha Colegio Arubano y Dienst Publieke Scholen (DPS) cu ta maneha Colegio San Nicolas.
E normanan di admision aproba ta basa riba tres componente, cu ta: Conseho di e scol basico; E cifranan di rapport di 5e y 6e klas di scol basico; Resultado di e “Colegiotoets”. E cambio ta drenta na vigor inmediatamente y aplicabel pa esunnan cu a traha e toets di Colegio e aña aki cu ainda no a ricibi admision na Colegio Arubano of Colegio San Nicolas. Esaki ta conforme e cambionan den ley y conforme e tarea di e comision cu a keda instala via di un Ministeriele Beschikking.
E ley nobo ta stipula cu e normanan di admision no por wordo determina solamente pa e scol of directiva di scol mas pero e normanan aki mester ta mas bien normanan nacional cu ta wordo determina den un comision y cu mester conta cu aprobacion di Minister di Enseñansa. Un aspecto hopi importante di e cambio di ley ta cu e normanan di admision no por ta basa solamente riba resultado di un toets mas, den e caso aki e “Colegiotoets”, cual tabata e unico factor cu e scolnan tabata considera pa admision pa e ultimo añanan.
Conforme ley y procedura nobo mester considera diferente componente cu hunto ta forma e resultado di admision. E comision mester a determina ki peso cada componente ta haya y con ta yega na e resultado final riba cual ta dicidi si un alumno ta cualifica pa admision. E ley y maneho nobo ta distancia su mes di e practica unda ta basa admision riba solamente un “momentopname”. Pa aña escolar 2016-2017 ta considera mas componente pa evalua e capacidad y potencial di e alumno incluyendo parti di e trayectorio y resultadonan di e alumno na scol basico.
Awo cu e normanan di admision oficial pa ciclo basico HAVO/VWO pa aña 2016-2017 a keda aproba, Minister di Enseñansa a comunica esaki formalmente cu e directivanan di scol. E directivanan di scol, den e caso aki SMOA (Colegio Arubano) y DPS (Colegio San Nicolas) na nan turno lo bay haci e calculacionnan necesario pa cada alumno y lo mester comunica lo mas pronto cu ta posibel e resultado final di admision cu cada candidato y cu e scolnan basico.
Tabata algun dia pasa cu a bin confusion riba e resultado di admision na Colegio ora cu e scolnan a duna resultado di admision na alumnonan sin cu a aproba e normanan nacional pa admision pa aña escolar 2016-2017. E scolnan a actua prematuro y a duna resultado di admision un biaha mas solamente a base di e Colegiotoets mientras cu conforme ley esaki no ta permisibel mas. Importante pa menciona ta cu e resultadonan no lo cambia pa e alumnonan cu ya a haya un carta positivo di admision di scol.
Ainda tin varios elemento pa cu transicion di scol basico pa scol secundario y specialmente e aspecto di admision pa scol secundario cu mester wordo evalua. E comision cu a keda instala lo bolbe reuni den cuestion di algun siman pa cuminsa prepara y traha riba e maneho y normanan di admision pa aña escolar 2017-2018 pa asina esaki por ta cla na tempo y por wordo comunica na tur scol y na publico general.
Minister Michelle Hooyboer-Winklaar ta lamenta cu na prome instante a surgi confusion door cu Colegio a actua prematuro y cu esaki a conduci na stress innecesario cerca alumno y mayornan.
“Mi ta satisfecho cu e resultado di e comision mirando cu e normanan di admision cu a keda aproba ta mas husto teniendo na cuenta e capacidad y potencial di e alumno. Trato husto di nos studiante semper mester prevalece y cualkier ley of maneho cu nos aplica den enseñansa semper mester ta na beneficio di e studiante y no un continuacion di un tradicion of custumber conviniente pa adulto”, asina Minister Hooyboer-Winklaar a declara.
