Ainda nos pais ta subestima e impacto cu uzo di tecnologia ta produci den nos mercado laboral. A pesar cu ya caba varios cupo di trabou entre otro den sector bancario y companianan di seguro, ta bay perdi pa uzo di sistema online y digital den nan operacionnan regular.

Mediador di gobierno, Anselmo Pontilius, a declara na Bon Dia Aruba cu e desaroyo aki ta evidente rond mundo y Caribe no ta niun excepcion. Un cantidad di empresanan ta scoge e caminda den cual e parti di e tecnologia ta domina. E ta haya cu historia di humanidad ta mustra cu cada epoca ta bin cu cambionan drastico den e mercado laboral, manera epoca di industrialisacion.

Den nos epoca actualmente empresanan ta scoge pa traha cu menos personal pa motibo cu hendenan ta haci uzo di tecnologia avansa. Si antes recibo di utilidad tabata wordo paga personalmente, ya caba un porcentahe di usuario a opta pa paga nan via internet fei di nan cas haciendo uzo di E-bank.

Retonan
Sr. Pontilius ta considera cu e situacion aki ta crea un resto grandi pa tur gremio hunto cu gobierno pa no solamente bin cu debatenan, sino pa nan busca alternativanan. “Un isla chikito manera nos, kico ta e alternativanan cu ta prepara pe”, e di. Esaki den sentido cu si tin empresanan cu ta bay reduci personal e punto cardinal ta, con nos ta prepara nos mes pa no warda te ora e momento ta yega.

E ta haya cu mester cuminsa prepara e hendenan mentalmente y tambe prepara nan cu conocemento adicional. Enseñansa pa Empleo a percura pa prepara nos hendenan pa drenta nos mercado laboral. Pero e ta haya nan mester cera cabes hunto cu departamento di educacion, dunado di trabou y sindicatonan pa analisa cual ta e sectornan cu lo wordo afecta of ta wordo afecta pa uzo di tecnologia. Nan ta retonan cu nos no por sinta warda pa atende cu ne.

Igualmente mester tene cuenta den e actual circunstancia aumento di edad di pensioen ta un di e fenomenonan cu a haci cu e hendenan ta dicidi di traha mas largo pa motibo cu nan entrada no ta suficiente. Un pregunta cu sigur ta keda draai ta si den e proximo 5 pa 10 aña e persona cu tin edad di 60 aña cu kier of no kier tin cu sigui traha pa motibo cu e pensioen di behes so no ta alcansa pa e tin un bida digno. Con e hendenan aki por ta den e mercado laboral sin cu nan no ta stroba e masa di hobennan cu tambe tin un derecho di drenta den e mercado laboral.

Analisis
Analisando e cifranan di 2016 e cantidad di porcentahe di trahadonan cu tin pa sector, ta wordo premira cu tecnologia tin su impacto den e sector di servicio. Ya caba RBC Bank a bin cu plan di reduccion di nan personal. Tambe compania di seguro ta cuminsa reduci nan personal of nan ta abstene di tuma mas personal cerca nan. Den e sector di casino cierto tempo ta bin problemanan den cual ta visibel e cambionan cu nan a pasa aden. Nan ta cambionan cu nos no lo scapa di nan.

Sr. Pontilius a indica cu e cifra di 2016 di Departamento di Labor y di Banco di Seguro Social (SVb) ta mustra cu e aña ey casi 48.500 hende ta traha y ta ricibi un salario. Pues casi un 50% di nos poblacion tin un salario. Sinembargo e pregunta cu ta den laira ta: con e situacion ta aworaki y con esaki lo sigui den futuro?

Esaki kiermen cu eventualmente pa atende un situacion asina e intensidad laboral pa siman lo bira menos. E ta un alternativa pa comparti e cuponan di trabou cu esunnan cu mester sigui traha tambe. Sinembargo mester analisa con un cambio asina riba intensidad laboral versus entrada di gobierno lo influencia e pago di belasting. Tambe e salario cu e trahado lo ricibi. Aruba ta wordo considera como un di e islanan unda mas impuesto ta wordo paga. E pregunta preocupante cu ta surgi ta: Con nos por sobrevivi? Tambe con nos lo por preveni cu nos problema social no lo bira mas grandi pa causa di desempleo.

Otro inkietud tin di haber si e generacion nobo cu ta sali for di scol si nan lo tin espacio y posibilidad di drenta mercado laboral. E reto aki ta riba mesa y pa e rason ey ta hopi importante cu aparte di tur otro problemanan social, financiero, economico cu nos por tin, e reto por haya su atencion tambe. Mediador di gobierno ta haya cu e trabou aki ta uno grandi den cual bo no tin un solucion den un solo discusion.

Aworaki tin un cantidad di analisis pa ehempel na Hulanda riba e sector financiero caminda uzo di tecnologia tin un rol fundamental. E ta sigur cu minister di Labor kende a bay atende e conferencia di organisacion internacional di labor (ILO) ta consciente di esaki, unda nan a atende e fenomeno di cuponan di trabou cu ta disparciendo of cu a disparce caba.

Aunke Aruba tin un sector fuerte cu ta turismo, mediador di gobierno ta haya cu mester cuminsa prepara riba otro sectornan. Ki alternativa nan tin pa un isla manera nos cu ta competi cu otro islanan di Caribe. Te ainda tin un discusion riba industria petrolero den caso cu refineria ta habri, cuanto hendenan por capta, aunke ya sea temporalmente.