E conoci Marlon (Marlonchi) a bay Hulanda no mucho tempo atras pa cuminsa cu un programa di rehabilitacion, pero desde inicio caba tabata tin problema di tur sorto cu por a lesa riba rednan social concerni su bienestar. Tin ta bisa cu Marlon a wordo saca for di e centro y hera keda riba caya pero segun sra. Rovena Autar kende ta casa di Marlon su primo y mediador di Marlon pa e famia, e mama di Marlon ni ningun otro miembro di famia sa di e paradero actual di Marlon.
Den fin di siman, Aruba Human Rights For All a skirbi riba Facebook cu Marlonchi tabata riba caya na Hulanda. Segun e informe aki, Marlonchi a wordo saca for di e centro na Hulanda caminda bo por a mira hasta potret di maleta y tur su pertenencia nan. Aruba Human Rights For All ta agrega cu Marlonchi tin mester di yudansa urgente pero cu actualmente e ta cerca cierto hende cu ta yudando e.
”Hende ta bisami cu Marlonchi ta bon pero te ainda mi no a haya chens di papia cu Marlonchi mi mes. Nos no ta sigur di nada anto su mama ta hopi preocupa. Mi no ta haya ningun number di telefon ni nada” , sra. Autar ta comenta.
Redo ta bayendo rond mas lihe cu e berdad
Segun informe di Aruba Human Rights For All, e grupo cu ta responsabel pa hiba Marlonchi Hulanda y e Pastor na e Centro na Heerlen a comete un acto inhumano pasobra ta nan responsabilidad pa tur cos bay bon cu Marlonchi na Hulanda.
Bon Dia a papia cu Sue Ellen Tromp kende ta un di e persona nan den e grupo cu a yuda hiba Marlonchi Hulanda. ”Mi a ricibi informe cu supuestamente e famia cu tin Marlonchi kier tin tur cos priva y ta pa e motibo aki mi no por haya ningun number di telefon of manera pa comunica cu Marlonchi” , sra.Tromp ta bisa. Sra.Tromp ta agrega cu nan grupo ta cana documenta y tin cada un florin nota di tur placa cu a bay y for di unda e la bin. Despues cu Marlonchi a yega Hulanda, e responsabilidad no ta cay mas bao di e grupo pasobra Marlonchi ta mayor di edad.
Sra. Tromp ta splica door cu e grupo ta riba su mes nan mester saca for di nan mesun placa pa manda pa e Pastor na Hulanda y cu e Pastor a inscribi Marlonchi siman pasa oficialmente pa e cuminsa cana su caminda.
Ningun hende no a core cu Marlonchi
sra.Tromp ta conta Bon Dia cu e tabata tin contacto cu Pastor David Secunda na Hulanda na tur momento pa e sa con ta bayendo cu Marlon. ”Na mas di un ocasion, Marlonchi a haci hopi fastioso cu nan y haci nan bida imposibel. Teniendo na cuenta cu Marlonchi tabata sa for di tempo cu e la bay for di Aruba cu ta bay tin regla na cualkier centro cu e bay y cu e ta mayor di edad kemen e no ta obliga pa keda eyden”, sra. Tromp ta splica.
Sra. Tromp ta bisa cu pa via di esaki, un dia e la core bay for di e luga. Nan a logra di haya Marlonchi bek, nan a papia hopi cune y e la keda atrobe. Despues e la cuminsa falta respet di hende den e iglesia, nan a pordon’e , haci oracion cune anto e la bolbe calma. ”Algo a bay robes cu un dia nan tabata tin dia di vasten cu no tabata mag di come te cu 8or of algo asina, anto esaki Marlonchi no a gusta. E la menasa nan cu cuchiu anto ora cu nan a hal’e un banda e la bolbe rabia. ” sra.Tromp ta splica.
Despues di esaki, nan a bisa Marlonchi cu si e no por cumpli cu e regla nan, e mester sali. E ora ey segun sra.Tromp, Marlonchi di su mes e la bisa cu e kier sali. Tur esaki, segun sra.Tromp, ta e version di Pastor David. ”Segun e pastor a bisami Marlon a bay vrijwillig, pero nos mes no a papia cu Marlon ainda pasobra e ta priva cu e famia cu tin e eynan” , sra. Tromp ta bisa.
Sra.Tromp ta splica cu nan ta purbando di haci tur cos posibel pa yuda pero nan ta na Aruba, anto aworaki nan man ta mara pasobra na Hulanda esnan cu a tuma Marlonchi no kier duna informacion.
