Ayera pais Aruba y FCCA a firma un convenio pa cuminsa traha cas social: 14 cas social na San Nicolas, 36 cas social na Tanki Leendert, Sta. Cruz, y na Hato tambe 12 cas.
Esaki ta locual minister Otmar Oduber(POR) a anuncia. E mandatario a remarca cu desde cu a asumi e responsabilidad como e minister encarga cu e aspecto di vivienda, un di e metanan tabata pa crea un relacion nobo cu FCCA como partner di gobierno di Aruba.
Den pasado prioridad no a wordo poni riba construccion di casnan social. Algun cas a wordo construi si, pero no na un cantidad cu ta representa e necesidad cu tin pa cas actualmente, minister Oduber a trece dilanti. ‘Ta papia di riba 2500 casonan di prioridad y necesidad cu tin, mientras cu e construccion di casnan no a bay na e mesun velocidad’.
Esaki ta segun e comunicado cu nos a ricibi di minister Otmar Oduber.
Un di e puntonan cu ta sumamente importante di e convenio aki ta cu e enfoke no ta riba vivienda solamente, sino tambe riba creacion di hogar pa personanan den comunidad y pa percura cu tin mehoracion den calidad di bida. “E firmamento ta algo grandi y historico pa ambos organisacion considerando cu ta pa prome biaha ta firma un tipo di acuerdo asina, unda cu tur organisacion por duna nan aporte pa conhuntamente yega na un convenio unda tur perspectiva y meta ta wordo representa”, e minister a bisa.
Miho prijs di construccion ta significa cu por yuda mas hende
Dialuna a cera un convenant cu FCCA cual ta forma parti integral di e statuto di FCCA, cu ta mara e relacion cu gobierno como partner pa logra e meta poni dilanti pa ambos partner. Den esaki ta haya participacion di gobierno pa hunto por logra miho prijsnan di construccion, cual lo haci cu por ofrece miho prijsnan di huur pa cas, cual na su turno ta haci cu gobierno lo mester duna menos subsidio y di e forma aki por yuda hopi mas hende.
Lo distribui cantidad di casnan social den diferente bario
Por anuncia cu tin casnan cu lo wordo entrega den diferente bario e aña aki. Lo finalisa 36 cas na Savaneta, otronan cu ta cuminsa e aña aki tambe ta: 14 cas social na San Nicolas, 36 cas social na Tanki Leendert, Sta. Cruz, y na Hato tambe tin 12 cas ta wordo construi. ‘E meta no ta pa crea barionan atrobe di casnan social, manera cu a conoce den pasado. Contrario na esaki, e maneho ta pa distribui e cantidad di casnan social den diferente ‘verkavelingsplan’. Pa no crea barionan cu por bira un problema den futuro.
E proyecto di mas grandi cu tin ta na Kiviti (80 cas), cual ta un di e excepcionnan. E motibo pa esaki ta teniendo na cuenta e necesidad cu tin pa cas social y e oportunidad cu tin pa esakinan wordo construi na Kiviti’. Di e forma aki Poco poco ta logrando e meta cu a pone, cu kier logra construi 200 cas social pa aña. Conhuntamente cu FCCA, ya caba a cuminsa combersa riba kico ta bay pasa proximo aña y di e posibilidad cu tin pa esakinan tuma luga na diferente otro sitio rond Aruba, pa asina cu drenta 2019 por inicia cu e procesonan aki.
Terminando Minister Oduber a remarca cu firmamento di e convenant ta simbolisa comienso di un relacion nobo cu FCCA.
