Pastoor Jairo: Acusacionnan ta sin base y sin prueba

Bon Dia Aruba a entrevista Pastor Jairo Maduro di Parokia Cristo Rey na Brazil unda cu e tin 8 aña trahando. Pa loke ta e situacion cu a presenta cu e misa siman pasa cu diferente graffiti, e misa su porta ta keda cera como protesta te dia cu pidi pordon y misericordia pa e hendenan cu a haci esaki.

A inicia e entrevista puntrando Sr. Maduro di unda e ta kere cu e acusacionnan den su direccion ta bin. El a bisa cu e acusacionnan ta sin base y sin prueba. “Di unda e graffiti ta bin, mi por bisa cu e ta di hende cu a promociona esaki riba media social, hende cu a purba yuda otro hende. Esaki ta di dos misa cu a wordo susha, algo cu na Aruba no ta custuma cun’e pasobra hende no ta mishi cu cas di dios. Ora cu yega asina leu pa haci esaki nos ta mira cu falta balornan, etica, moral, respet y spiritualidad riba nos baranca. Tin hende cu kier yuda otro hende, pero nan no tin e capacidad, tin ora na e punto cu ta sospecha cu nan mes mester di yudansa anto ta cuminsa haci di un cos un drama y nan no por sostene.”

Atake personal

Segun Sr. Maduro e ta sinti e atake ta personal aunke cu nan no a pone su nomber, nan a pone pastoor sin a e murayanan di e misa cu e ta dirigi cual e ta tuma cu a dirigi e palabranan na dje. “E ta un atake personal, ami tin otro cos pa haci y mi no tin tempo pa perde cu e cos aki.”

El a sigui bisa: “Mi ta bay laga e luga asina aki pa un tempo, e porta ta keda cera y paden mi a pone candal cu cadena cual lo habri te ora haci acto di reparacion y pidi pordon y misericordia pa e hendenan aki. Despues ta drecha e entrada bek y habri e porta, esaki ta mi protesta. Mi a papia cu Obispo caba y el a bay di acuerdo. Esaki ta pa mustra cu nos comunidad no por bay den e direccion aki. Nos no por biba cu vandalismo cada dia riba nos luga, esey no ta sirbi.”

Graffiti ta algo cu ta existi den historia pa hopi aña como un manera di protesta, a puntra pastoor kico e ta pensa. El a bisa: “Ami ta mira tin hende ta haci graffiti nechi, esaki ta djis vies y ta haci e luga mahos, tilda hende di cualkier cos. E ta un acto di cobardia pasobra no ta mustra cara, cual ta tristo.”

Hende inclina pa scoge maldad

Desde era di bijbel hende ta inclina pa scoge cos cu ta malo y bira multitud. Ehempel den e caso di Hesus, ora a puntra ken kier pa sali liber Hesus of Barabas, y tur hende a grita Barabas. Barabas a sali liber y a grita haci fiesta y Barabas a bay. Hesus cu a haci bon pa tanto hende a bay na cruz. “Si un hende bisa un cos tur hende kier opina riba esaki, den e caso aki mas tanto riba pastoor pasobra pastoor ta un figura hopi publico y mas ami ainda pa mi forma di traha unda cu mi misanan ta na television, kiermen bo ta haya bo cu esakinan.”

El a sigui bisa cu hende cu no ta haci nada ta net nan t’ey pa critica, pero hopi biaha bo ta bisa cu e hende nan aki ta pober di mente. Tur e hendenan cu ta hisa benta riba hendenan cu realmente si ta traha pa comunidad. Pasobra esun cu ta crea tur esakinan, e no sa kico mi ta haci. “E ta bisa cu e ta yuda tur hende, pero mi ta puntra cu kico y ki manera e ta yuda hende cu e mes ta mustra y ta duna señal cu e mester yudansa. Mi a invite pa bin cerca mi otro siman pa papia riba e cosnan aki.”

Finalmente un mensahe di pastoor ta, cu nos tur aki riba Aruba mester biba na drechi cu otro, asina ki nos no ta soluciona nos problemanan. Mi sa cu hopi biaha hende tin reclamo y kier husticia pa nan situacion. Esey no tur biaha ta den nos man. Nos no por bisa fiscal of hues kico e tin cu haci. Tin procedura cu mester cana, tin ta cana lihe y otro slow, asina cos ta bay. Pero si cuminsa campaña cu sushamento e ora esey no ta sirbi di nada. Kisas prome rato, hende ta bisa bon pero tur hende ta cuminsa fada di mira luga sushi na cierto momento. Anto ora cu ta mishi cu Alto Vista cu ta santuario nacional, tur hende ta condena esaki, ora cu mishi cu  misa hende ta rechasa esaki, el a bisa: “Mi a haya hopi yamada cu a bisa mi cu nan no ta di acuerdo cu e cos aki. Tin hende kier a hasta bay tuma cierto medidanan den nan mesun man y mi a bisa nan pa no haci esaki pasobra iglesia no ta procede asina,” Sr. Maduro a termina bisando.