Fundacion Rancho a duna balor y contenido na e Dia Internacional di Museo pa medio di un charla organisa na Museo Arkeologico di Aruba.
Presidente di e fundacion aki, Clifford Rosa a declara na Bon Dia Aruba cu nan no a neglisha e fecha aki ya cu e bario historico ta practicamente un museo habri na aire liber. Nan tin elementonan importante di nos herencia cultural material manera forno di calki, tanki di awa y varios hanchi cu ta forma parti di Rancho su patrimonio.
Pa tal motibo nan a organisa e charla aki cu a conta cu tres orado, nan ta: Jerry Franca kende a papia tocante e hanchinan den Rancho. E artistanan Ciro Abath kende a biba un parti di su infancia na Rancho y el a papia riba su recuerdo tocante e tanki di awa. Mientras cu Rosa a papia tocante e forno calki. El a laga sa cu Rancho tin tur caracteristica di un museo publico of habri, pero te ainda niun peticion formal a wordo haci pa dune e status aki.
Rancho un museo bibo
Nan ta evaluando con e reaccion lo por ta den comunidad mes di Rancho, ya cu comunidad ta parti di e museo. E fundacion kier haya prome un sosten di e comunidad prome cu nan por haci un peticion oficial. Tin doño di casnan y edificionan na Rancho cu nan tin temor pa nan haya e seyo cu tin di haber cu un monumento proteha. Unabes cu e propiedad ta haya e seyo aki tin reglanan cu ne y nan ta sinti cu nan ta perde autoridad riba nan propio propiedad. “Un propiedad di bo y bo no por haci nada cu ne”, e di.
Rosa a indica cu e pasonan aki tambe a wordo tuma na Corsou pa logra e tipo di museo den comunidad. Fundacion Rancho a tene cuenta cu e pasonan aki, pues no ta cuestion cu como fundacion gewoon nan kier bin cu un museo na aire liber. Pero e echo cu Corsou a haci ta reconfirma nan cu e no ta un idea descabeya y cu algo asina por.
Hopi di e islanan Hulandes den e area di waf tin un historia rico y valioso. Pero lamentablemente esey ta bay perdi, pasobra tin hendenan cu no ta duna un balor real na dje. “Ta poco organisacion cu bo por bisa cu ta atende cu e tipo di cos aki”, segun Rosa.
Rancho tin cosnan pa mustra
Un patronchi cu fundacion Rancho ta uza pa midi e aceptacion di un idea di bin cu un museo na aire liber ta nan ‘walking tour’. Esakinan ta wordo refleha riba e potretnan di fundacion Rancho cu nos ta publica cu e articulo aki.
Rosa a bisa cu tur reaccion te awe ta positivo. Recientemente nan a haya e presencia di un docente Hulandes kende tin alrededor di 25 aña caba dunando les di arte y cultura den International School. El a keda encanta di locual e por a mira y compronde di Rancho su historia. Esaki banda di tur e otronan partinan cu e docente a mira y scucha cu ta negativo.
E ta haya cu e material di informacion ta hopi importante pa e docentenan cu ta biniendo na nan walking tour. Nan ta informacion valioso pa nan mes cu kisas nan sa ‘pero no tin e contexto y sabor di e comunidad’.
P’esey fundacion Rancho a dicidi di tuma e fecha di Dia Internacional di Museo cu un tema nobo pa hala atencion di publico. “Nos como fundacion Rancho ta hopi entusiasma pa mira cu den un Museo Arkeologico, unda nos a nace como fundacion, nos por menciona akinan e idea di un museo di aire liber”, presidente di fundacion Rancho a declara na Bon Dia Aruba.
Un di e metanan di fundacion Rancho ta esun di conserva y salvaguardia parti di herencia cultural material y inmaterial di e bario aki.
Proteccion y atencion
E hanchinan, tanki di awa y forno di calki ta parti di e herencia material cu ta bayendo perdi. Nan condicion ta deteriora, esaki apesar cu e fundacion hunto cu otro partnernan ta purba di mantene limpi. Rosa ta haya cu eventualmente un motibo cu ainda e tipo di monumentonan aki no a haya nan debido atencion ta debi cu nan no ta genera placa cu un huurdo manera un edificio monumental.
“Esaki ta haci un tiki dificil pa por haya fondonan adecua pa purba haci algo cu e monumentonan aki”, e di.
Ademas di e parti material, Rosa ta haya cu tin otro contexto relaciona cu e monumentonan aki. El a destaca e charla cu sr. Franca y sr. Abath a haci, ya cu nan a bira fuente di hopi informacion inmaterial tocante historia di e hanchinan y anecdotanan rond di e tanki di awa na Rancho.
E fundacion kier sigui haci uzo di personanan cu a biba of cu a pasa nan infancia na Rancho pa asina nan por trece nan historia. Asina nan por fortalece e motibo cu e fundacion kier conserva, esta e parti material y inmaterial, ya cu e dos aspectonan aki ta bay hunto cu otro.
E ta considera cu nan ta informacion valioso, ya cu hopi documento y buki cu ta existi ta skirbi fei di un bista di e parti colonial. Pero aworaki nan ta purba wak historia fei e parti di e comunidad mes, ya cu informacion di comunidad ta diferente na e informacion di e parti colonial.
