Pa atende cu e crisis financiero

Minister di financia, Xiomara Ruiz-Maduro (MEP) ta haya cu momento a yega pa sector bancario duna su contribucion tambe pa atende cu e crisis financiero y social cu nos pais ta pasando aden.

Di e forma aki el a reacciona riba e declaracion duna pa presidente di Asociacion di Bankeronan di Aruba (ABA), Elvin Maduro, kende a declara den un medio digital local un aumento di 6% riba tur transaccion bancario den cuadro di ley di crisisheffing.

E mandatario a lamenta cu ABA a bin cu e tipo di declaracion aki cu ta trece un impacto den nos comunidad, mientras cu e berdad ta otro. El a laga sa cu di cada 5 florin cu banco ta cobra pa nan servicio na cliente loke banco mester contribui den caha di gobierno via BBO ta 30cen. E no ta haya cu tin motibo pa nan bin cu un aumento riba nan tarifa, despues cu banco a gosa di un exoneracion di casi 10 aña sin paga BBO.

“Pa kico mester pensa di biaha pasobra gobierno ta bay kita 30 cen fei 5 florin, anto di biaha mester pensa con nos ta bay coge e 30 cen aki pa hisa esaki atrobe pa cobra e pueblo cun’e”, e mandatario a afirma.

Antes e banconan tabata keda cu 5 florin full. Pero awor cu e cambio haci den diferente ley cu e aprobacion di e ley di crisisheffing, e sector bancario no tin exoneracion mas. For di 5 florin nan ta bay keda cu 4,70 fls y mientras 30 cen ta bay pa caha di gobierno. “Kico ta pone bo cu toch bo ta dicidi cu no, mi ta bay cobra e cliente”, e di. E mandatario ta lamenta cu e banconan no kier duna di su parti. Pero e ta dispuesto pa sinta cu nan pa splica e contribucion fiscal di e sector bancario den cuadro di e ley di crisisheffing cu lo drenta na vigor entrante otro luna.

E mandatario no ta sinti cu esaki lo ta un carga pisa pa e sector bancario. El a remarca cu na final banco por kita esaki 100% for di nan winstbelasting. Na fin di dia, e ta haya cu banco no tin tanto molester cu e pago di BBO riba nan servicio, ya cu nan por kita bek loke nan mester paga fei nan ganashi.

El a bisa cu e cambio aki no ta pa stroba e core business di e banco, pasobra den e ley di crisisheffing nan no a mishi cu e interes cu e banco ta cobra. “Bisa mi cual banco ta perde placa na pais Aruba”, el a bisa.

El a declara cu e core business cu ta e interes cu banco ta gana na momento cu e ta presta placa of duna hipoteca, banco no ta paga BBO riba dje. E ta haya cu gobierno no ta strobando banco pa sigui haci su operacionnan.

El a bisa cu for di 2007 tabatin exoneracion di BBO pa e sector aki. A pesar di esey, e banco a hisa nan tarifa riba transaccion bancario di 3 pa 5 florin. Te hasta nan a yega di hisa nan tarifa pa otro servicionan administrativo, y no tabatin niun reaccion. Segun e mandatario e por compronde cu e gastonan ta subi, pero di otro banda como minister e tin cu bisa cu e esfuerso cu gobierno tin cu haci na pais Aruba ta uno conhunto.

Nan a beneficia pa casi 10 aña di e exoneracion aki di BBO. Pero for di 1 di juli 2018 no tin e exhoneracion aki di BBO riba loke e banco ta cobra pa nan servicio.

E mandatario a expresa su disculpa ya cu nan no por hiba un dialogo mas amplio cu tur sector riba e pakete di impuesto cu nan a introduci. Sinembargo el a laga sa cu nan tur tabata na altura di nan. Ya cu e prome mandatario a tene un ronda di combersacion cu nan pa splica e situacion financiero dificil cu nan a hereda y con nan ta bay atende cu nan.