VENEZUELA: Union Europeo a yega na acuerdo pa mas sancion

E paisnan di Union Europeo (UE) a yega na un acuerdo pa adopta sancion nobo contra Venezuela, despues di e eleccion presidencial cu nan no ta considera creibel, y a pidi pa tene eleccion nobo “liber y transparente.”

Union Europeo a bisa den un declaracion conhunto di e ministronan di asunto exterior, cu nan ta pensando riba medida restictivo reversibel adicional, cu no lo perhudica e poblacion Venezolano , pa ken Union Europeo ta desea di alivia e situacion dificil. “

Reuni na Bruselas, e canciyernan di e Union asina a duna luz berde pa e adopcion di medida nobo, pa cual ta supone cu ta trata di un lista di persona implica den e celebracion di e eleccion, aunke no ta anticipa cu lo duna di conoce e nombernan oficialmente prome cu nan proximo reunion, na juni.

E canciyer Spaño, Alfonso Dastis, a splica na su yegada na e encuentro cu e obhetivo di e reunion tabata pa pone e procedimentonan cana pa amplia e circulo di persona afecta pa e medidanan restrictivo, despues cu UE ya a sanciona siete funcionario halto di e regimen.

Den e declaracion di ayera e ministronan ta subraya cu e ultimo acontecimentonan na Venezuela “a aleha ainda mas di e posibilidad di un solucion negocia constitucional, cu ta garantisa respet pa democracia, estado di derecho y derechonan humano.”

E paisnan a lamenta cu a pesar di “numeroso yamamento” di e actornan politico nacional y di comunidad internacional, incluyendo Union Europeo, a tene eleccion presidencial mas tempran, sin un acuerdo tocante fecha o e condicionnan, y den circunstancia cu no a permiti participacion di tur partido politico a base di igualdad.

UE a pidi tambe pa reconoce independencia di tur e institucionnan elegi democraticamente, especialmente Asamblea Nacional, e liberacion di tur preso politico, e defensa di estado di derecho, derecho humano y e libertadnan fundamental.

E ministronan a reitera ademas e apoyo Europeo na Venezuela pa “yuda haya un salida democratico pa e actual crisis multidimensional,” como tambe pa e situacion humanitario, y a sigura cu UE lo mehora “su alcance diplomatico.”