Juan Carlos Huerta, un periodista di radio y television di e estado Mexicano Tabasco, den sur di e pais, a ser asesina ayera mainta pa un grupo di homber arma ora e tabata sali di su cas, segun informacion di fiscalia di e estado.
Di acuerdo cu e prome informenan, Juan Carlos Huerta a topa cu un emboscada, opera cu dos auto ora e tabata sali y a tira por lo menos cuatro biaha riba dje.
Gobernador di Tabasco, Arturo Núñez,a confirma e suceso, sigurando cu “nan a yega pa mat’e.” Na e luga a yega tambe e fiscal di estado, Fernando Valenzuela Pernas.
Huerta tabata e titular di e programanan local Notinueve y Panorama Sin Reservas, un di e noticieronan di corte politico di mas influencia di e estado.
E asesinato a sucede hustamente riba e prome aniversario di e asesinato di e periodista Javier Valdez, na Culiacan, Sinaloa. Na 2017, ademas di Valdez, a asesina 11 periodista, y den e aña aki ya ta registra cuatro homicidio di profesional den e ramo aki.
Cu mas di 100 periodista asesina desde aña 2000, Mexico ta cataloga pa organisacionnan civil y di derecho humano como un di e paisnan mas peligroso pa eherce periodismo, y Veracruz ta e estado mas mortal, cu mas di binti homicidio. Practicamente den ningun caso di asesinato di periodista ta logra pone man riba e culpabelnan.
(fuente: Univision)
