“Ami ainda ta keda cu esaki pasobra mi kier demostra cu bo por biba di artesania. Pero e no ta facil. Bo tin cu sacrifica hopi. Y loke hende tin cu comprende ta cu trahando cu bo man ta tuma tempo. Pa bo traha riba bo producto y sinta na un kiosco ta un balans dificil. Pero sin sosten tambe ta dificil.”
Siguiendo e desaroyonan riba Welcome Plaza manera Bon Dia ta bin ta haci pa algun lunanan, ta aparenta cu e negoshantenan na e kiosconan ta haya dificultad pa paga e huur pa e kiosconan akinan. Alabes un di e unico artesanonan cu ta trahando productonan autentico di Aruba na e kiosconan ta señala cu aunke kier bin un manera pa promove artesania bou e kiosconan, e ta kere mester bin cu esaki di un manera realistico.
Trudy Lampe, kende tin mas cu 40 aña trahando pa artesania na Aruba, ta e artesano local cu mas aña di experiencia den ceramica na Aruba. Sra. Lampe tin tempo ta sacando nomber di Aruba na nivel internacional tambe cu su artesania y bringando pa artesania haya un aprecio y reconocemento mas profundo na Aruba, pero ‘sin aporte ta dificil pa sigui’. E tin un kiosco na Welcome Plaza yama The Island Shop, unda e ta bende productonan di klei cu e mes a traha y tambe di otro artistanan y artesano.
‘Welcome Plaza ta representa Aruba’
E aporte di cual sra. Lampe ta papia di dje ta particularmente di parti di autoridadnan y gobierno pa cultura di Aruba autentico haya un representacion amplio, particularmente na un luga manera Welcome Plaza cu ta e prome luga unda turistanan ta haya un imagen di nos isla.
Sinembargo aki un gran cantidad di kiosconan ta bende productonan produci masalmente y importa, unda simplemente ta pone nomber di Aruba riba e productonan aki cu por haya alrededor di henter Caribe. Aunke sra. Lampe no ta contra personanan cu kier gana nan pan di e manera aki, e ta haya cu na Welcome Plaza esaki no ta na su luga si gobierno kier promove artesania local y identidad cultural Arubano.
Mientras e parti di e concepto ainda falta ehecucion, sra. Lampe ta mustra cu tin cierto aspectonan practico cu tambe no ta bayendo bon. “Nan a priminti cu nan lo bin cu un borchi cu ta bisa cu aki ta Welcome Plaza, pero ainda no tin esaki. Cada dia cu nos ta aki nos por mira cu turistanan di crucero ta cana bay sin pasa aki mes.”
Esaki ta relaciona tambe cu e manera cu busnan y taxinan ta parkeer dilanti e kiosconan, blokiando asina e visibilidad di e kiosconan. Mientras Bon Dia tabata combersa cu sra. Lampe por a tuma nota cu polis mester a interveni cu e trafico pega den e caya dilanti unda e cruceronan ta baha. Nos a comprende di e bendedonan di souvenir cu esaki ta pasa regularmente.
Pa sra. Lampe tur esaki ta lamentabel mirando cu despues di tempo e por a mira cu poco poco mas y mas artesano Arubano a stop cu artesania pasobra e no ta un manera facil pa sobrevivi. “Ami ainda ta keda cu esaki pasobra mi kier demostra cu bo por biba di artesania. Pero e no ta facil. Bo tin cu sacrifica hopi. Y loke hende tin cu comprende ta cu trahando cu bo man ta tuma tempo. Pa bo traha riba bo producto y sinta na un kiosco ta un balans dificil.”
Mercado habri
Mientrastanto e interes di parti di turistanan pa productonan produci localmente ta creciendo. Esaki un otro artesano cu no tin kiosco na Welcome Plaza, Romelinda Maldonado, ta conta Bon Dia. Sra. Maldonado por a mira cu na diferente ocasion varios persona trahando cu turistanan ta puntra mas y mas unda nan por haya productonan autentico di Aruba.
”Demanda pa e parti aki di e mercado ta keda crece y aunke Welcome Plaza ta un bon luga pa bende esaki, no tin prioridad pa promove bendemento di cosnan traha na man te awo.”
Pa loke ta trata e prijs di huur na Welcome Plaza, varios biaha e bendedonan di souvenir a acerca Bon Dia pa indica cu e prijs ta mucho halto. Sra. Lampe awo ta agrega cu ta birando mas y mas dificil pa cera luna y paga e cuenta di huur y coriente. Ultimo biaha cu nos a acerca minister di infrastructura riba esaki tabata fin di februari. E minister a splica cu ‘lo mester laga DIP evalua e situacion, mirando cu nan tin un luna so ta paga’. Sinembargo el a agrega e tempo ey cu nan a fiha e prijs di huur den gobernacion anterior. Nos a acerca minister un bes mas pero no a haya contesta te awo.
Desde 3 luna pasa tempo cu e mandatario a anuncia cu lo hiba un maneho pa promove artesania bou Welcome Plaza, no tin mucho a pasa, manera sra. Lampe a mustra. “Pero mi no ta critica djis pasobra mi kier, mi kier cosnan cana bon aki y pa artesania haya chens pa crece bek.”
