Partido Raiz a entrega dialuna mainta un peticion na tres diferente minister, haciendo uzo di e ‘ley di transparencia’ (Landsverordening Openbaar van Bestuur) pa haya claridad riba gobierno su maneho pa loke ta encera e Ruimtelijke Ontwikkelingsplan (ROP).
E peticion tabata specificamente riba e proyecto Isla di Oro y segun un di e ministernan concerni, Otmar Oduber (POR), den cuadro di e transparencia cu kier crea tambe den tur otro proyecto cu ta atendiendo cu nan na e momentonan aki, a dirigi carta y invita RAIZ pa un reunion unda cu a haci entrega di un USB cu practicamente tur e documentonan concerni.
“Pa locual ta e traspaso cu a tuma luga di gobierno anterior, mester enfatisa cu gobierno actual no a haya casi ningun documento, sinembargo durante transcurso di e aña aki e desaroyadonan a trece dos map pa ministerio cu ta contene informacion cu a wordo entrega den pasado durante gobernacion anterior. Esaki ta informacionnan cu a traspasa riba un USB stick pa e partido RAIZ”, minister Oduber ta laga den un comunicado pa prensa. Segun e comunicado, e contenido ta encera entre otro e rapport di Milieu Effect Rapport (MER).
“A mustra e grupo riba e echo cu tur proyecto cu tin impacto riba nos medio ambiente, e MER rapport ta wordo manda pa departamento di Naturalesa y Medio Ambiente (DNM), caminda cu den e presupuesto ultimo a hasta percura pa nan haya dos funcionario adicional mirando e cantidad di trabou grandi cu tin.”
“E maneho cu tin actual ta un exigencia pa haya un rapport di MER pero cu e condicionnan di e rapport di MER ta aporba pa DNM. DNM ta esun cu tin cu bisa kico ta e condicionnan y bou cua rekisitonan un rapport MER mester wordo traha (A duna e partido copia di esaki tambe). Mirando cu gobierno na e momentonan aki no a tuma un decision den e proyecto aki, a bisa cu e maneho/ liña cora cu tin den e ministerio y den e gobierno den su totalidad ta uno cu mester crea un balansa entre desaroyo infrastructural y e cuido di nos medio ambiente. Y esey ta keda e maneho tambe pa cual nos a entrega nan e documento y papia tambe den e caso aki riba diferente otro topiconan den cuadro di por ehempel e cantidad di cambernan cu a wordo comprometi door di e gobierno/minister anterior cu na e momentonan aki ta atendiendo cu nan.”
E minister ta sigui bisa cu ‘tin di nan ta negociando cu nan y otronan ta den corte pa motibo cu a declara nulo e diferente acuerdo/contractonan of optie (opcion)nan cu a wordo duna. E mandatario tambe ta bisa cu mester yega un momento cu mester bin un moratorium riba e cantidad di cambernan di hotel, condominium y apartementnan. “Naturalmente permitiendo e desaroyo cu mester continua economicamente pa pais Aruba. Un mocion cu a wordo pasa tambe na Parlamento pa percura pa esaki tuma luga y cu sigur hunto cu colega Minister sr. Dangui Oduber, lo prepara tambe.”
Concluyendo minister Oduber a bisa di ta spera cu pa prome cu fin di aña nos lo tin un concepto di ley caminda bo ta ‘stel vast’ e moratorium riba cantidad di cambernan, hotelnan, condomium y apartement na Aruba, e comunicado ta bisa na final.
