Recientemente a keda lansa e website nobo Infr Aruba y tin 181 keho entrega caba via e portal.
E acogida pa locual ta e portal nobo Infraruba.com – bou iniciativa di Ministerio di Desaroyo Teritorial, Infrastructura y Medio Ambiente – ta hopi mas grandi di locual a wordo spera, segun e comunicado di DOW.
Te cu awe tin 181 keho cu a wordo entrega via e portal aki relaciona cu camindanan kibra/insigur, infrastructura publico sin mantencion, sushi di negoshinan y mas. InfrAruba ta hayando data cu no tabata bisto antes, manera kehonan drentando di bisiñanan cu ta laga nan awa sushi core den caya cual ta un keho cu a presenta su mes hopi biaha caba.
Tambe tin kehonan riba sushi di mascotanan y bestianan morto riba caminda. Yenando e formulario riba InfrAruba.com ta haci cu por medio di un rapport oficial asina ta yuda resolve e casonan aki mas rapido posibel. InfrAruba ta demostrando cu e informacion cu pueblo ta brinda ta informacion valioso cual ta yuda guia maneho y gobernacion a base di hechonan y datonan realistico. E balor di esaki ta algo incalculabel, segun e comunicado.
“Nos ta aplaudi un sistema nobo. Nos team di scout pa control ta limita, pues nos no tin e wowonan tur caminda pa controla tur cos. Esey kiermen for di construccion ilegal, buraconan den caminda y otronan. E sistema aki sigur lo bay yuda nos pa acumula data pa asina analisa con nos ta bay planifica mas miho pa futuro”, director di DOW, Marlon Croes ta expresa den cuadro cu lansamento di e portal nobo.
Un plataforma innovativo
Segun gobierno a trece dilanti siman pasa y cu Bon Dia a publica, Infraruba.com ta un iniciativa innovativo den nos region cu ta brinda e comunidad e oportunidad pa ta extra wowonan y eherce control necesario cerca un meldpunt cu tin su centro na e Task Force di Bureau City Inspector.
Manera conoci, mediante ministerio di Husticia y ministerio di Desaroyo Teritorial, Infrastructura y Medio Ambiente, a duna e tareanan necesario na City Inspector tambe pa por funciona cu un man un tiki mas conforme e autoridad necesario pa asina por actua den diferente ocasionnan.
“E tin cu bay den tal manera tambe cu e no lo agota nos presupuesto. Na DOW nos tin cu bay cu mantencionnan regular na 80% pa buffer e problemanan, e 20% nos lo traha via e sistema aki. E practica den e proximo dos luna ta bay duna nos un miho bista pa wak con nos lo sigui planifica,” segun director di DOW.
