E temporada di horcan 2016 ya caba ta den porta y pa e motibo ey e Departamento Meteorologico Aruba hunto cu Bureau Rampenbestrijding ta traha hunto pa asina trece tur informacion riba e tempo y ki efecto esaki tin pa cu e clima di Aruba. Sr. Mark Oduber, director di Departamento Meteorologico Aruba a indica cu e temporada di horcan por ta uno normal of riba normal.
E temporada di horcan di 2016 tin e anticipacion di e cambionan. Despues di a midi e AS index, nan a mira cu esaki den e ultimo 3 añanan ta basta abou. E aña akinan ta anticipa un cambio, di cual esaki ta bin principalmente pa algun factor climatologico. E pronostico di mayoria instancia, cu ta haci pronostico riba e temporada di horcan modelonan atmosferico y estadistica, tur ta mustra cu e temporada di horcan lo ta uno normal. E servicio meteorologico di Inglatera ta haci uzo di modelonan basta avansa pa core e pronosticonan. Esaki a indica cu den region di Caribe por haya un total 10 pa 18 tormenta tropical, di cual 6 pa 10 lo por bira horcan, cu un averahe di 12 tormenta tropical y 8 horcan. Esaki por ta un periodo cu ta normal of riba normal, segun sr. Oduber
Compara temporada di horcan
Comparando cu e temporada di horcan na 2015, tabata tin 11 tormenta tropical di cual 4 a bira horcan. Dos di nan a bira horcan fuerte, di cual Joaquin tabata esun mas conoci pa e periodo ey. E horcan aki principalmente a afecta e isla di Bahamas.
“Loke tambe ta interesante pa wak ta cu mayoria di e sistemanan tabata debil y nan a keda lama Atlantico,” e director a indica. “Maske cu tabata tin un cantidad di averahe, eigenlijk e temporada ta basta calma. P’esey e AS index cu ta midi e tipo di forsa di horcan a keda relativamente abou pa 2015.
Cambio di fenomeno climatologico
E cambionan principal den 2016 ta cu un factor den e parti Pacifico lo bay ta cambiando, aki ta referi na e cambio climatologico. Tur hende lo mira cu El Niño, cu tabata domina ultimo añanan, ta perdiendo forsa. Esaki ta nifica cu ta drentando den e temporada di La Niña cu ta uno debil of modera den e periodo di juli bay dilanti, segun sr. Oduber.
Boltia temporada pa Aruba
Tambe e departamento Meteorologico ta mirando cu den lama Atlantico tin par di factor cu lo bay yuda pa boltia e temporada di horcan y temporada di awasero pa Aruba. Por mira cu e zona entre Caribe y Africa lo bay ta mas activo y core un tiki mas den noord. Esey lo pone cu pa Aruba e chens di yobida lo bay aumenta y tambe lo bay yuda cu e ciclonnan tropical tin mas chens pa desaroya/forma ora nan hala mas den direccion noord. “Tirando bista riba tur e pronostico cu nos tin, nos a pone nan den estadistica y haci calculacion bo ta wak e chens pa un ciclon tropical pasa dentro di 100 miya di Aruba ta keda un 12 porciento, cu ta un averahe normal pa Aruba. Pero si tira bista riba otro isla manera Cuba y Santo Domingo, nan tin hopi mas chens di wordo afecta door di e ciclon tropical.”
