Recientemente corte di prome instancia a duna sentencia di 140 ora di castigo alternativo na un agente policial kende a bay cu un auto for di warda di polis na Balashi, considera como ladronicia.

Segun e sentencia, e agente a haci su mes culpabel di dicho sospecho ya cu no tabata tin e autorisacion pa bay cu e auto for di e warda. Abogado di e agente a trece e argumento dilanti cu su cliente no a bay cu e auto bou di e intencion di ladronicia, ya cu e lo a wordo sigura door di un mecanico di e warda cu e doño di e auto a tuma distancia completo di e auto. E agente den su defensa ta bisa cu el a haya autorisacion di su superior pa bay cu e auto.

Hues sinembargo no a kere e storia y ta bisa cu e sospechoso ta trahando den cuerpo policial desde aña 1993. Ademas di esey el a traha rond di 2010 como hefe reemplasante di e warda. Hues ta haya cu e agente tabata bon na altura di e procedura cu ta wordo tuma na momento cu un auto keda confisca y entrega bek na su doño. Ademas e agente sospechoso no por a demostra na ningun forma por escrito cu e doño di e auto a tuma distancia di su vehiculo. Bou di e situacion aki, hues ta haya cu e agente a haci su mes culpabel di apropia di algo cu no ta di dje, cual ta castigabel pa ley.

Doño di auto
E doño di e auto a entrega un keho y haci un demanda pa un total di 6.125 florin na daño material. Locual no por a wordo conclui, ta cu e daño cu ta wordo demanda a bin a base di e conducta di e agente sospechoso.

E auto tabata tin algun tempo para den cura di warda di polis na Balashi prome cu e la wordo hiba pa e agente. Un investigacion mas profundo lo mester wordo haci pa determina si di berdad tin material cu a wordo perdi y na ki balor esakinan ta. Si resulta cu ta berdad, lo mester bin un caso civil pa haci e demanda.

Castigo
Hues a bay di acuerdo cu exigencia di fiscal y a duna 140 ora di castigo condicional, cual lo mester wordo haci bou di supervision di Stichting Reclassering. Den caso cu no cumpli cu esaki, detencion condicional di setenta (70) dia lo wordo aplica.

Pa yega na e castigo, hues a tuma den consideracion cu e agente a mal uza su contactonan na e cuerpo policial pa beneficio propio, ta atacha nomber di cuerpo policial y cu den pasado e mesun agente tin historia di un acto similar, pa cual el a haya un castigo disciplinario di un boet. Pa redaccion di Bon Dia Aruba a keda interesante e hecho cu no a aplica castigo adicional (strafverzwarende omstandigheden) den e sentencia, dunado impresion cu ta existi husticia di clase.

Durante siman cu ta sigui, Bon Dia Aruba lo tuma contacto cu esunnan concerni pa mas informacion.