E dia ‘mas Hulandes’ di aña

Desde poco aña atras, celebracion di cumpleaños di e monarca Hulandes a cambia di 30 di april pa 27 di april. Prome cu esey, pa hopi decada 30 di april tabata e fecha, pasobra Reina Beatrix cu ta haci aña na januari, a haya april un miho momento, pasobra ya ta primavera, cu mas probabilidad di bon tempo. Pa nos naturalmente nunca esey tabata un consideracion, mirando cu den nos clima bon tempo ta garantisa semper. Hopi biaha ta tende e comentario, cu e celebracion di Aña di Rey, o Reina, no ta asina abundante, cu hopi evento, manera antes. Esey ta berdad, y por tin varios motibo. Un di nan ta cu henter nos bida a cambia, a bira mas agita, y den e comunidad mas compleho aki, organisa festividad ta un reto hopi mas grandi. Por tin mas aspecto, pero nos no por ignora e realidad. En todo caso, e ta keda un dia pa relaha y disfruta di e actividadnan cu si ta tuma luga ainda.

Pero, fuera cu nos ta semper contento cu un dia liber, kico realmente ta significativo pa nos riba e dia aki? E ta e dia riba cual di un of otro manera nos ta sinti nos mes Hulandes, aunke cu ser Arubiano nunca ta hala un banda? Nos ta sinti nos mes parti di algo mas grandi cu nos isla? Nos no ta pretende di por tira un bista den curason di nos tur; cada ken mester dicidi pa su mes kico esaki ta encera. Loke si nos ta observa, durante aña mes, cu hopi biaha e sentimento di pertenece na e entidad mas grandi cu nos teritorio aki ta ausente, y hasta ta traha luga pa sentimentonan anti-Hulanda, sigur na momento cu den e relacion gubernamental tin diferencia di opinion entre Oranjestad y Den Haag. Ta mustra principalmente riba e aspecto negativo di e nivel di supervision di Reino, cu ta menasa pa kita nos afamado autonomia di nos, haciendo aparenta cu ta pa malo Den Haag ta haci esaki. Y si acaso tin un gobierno local cu ta colabora bon cu Den Haag, ta tende tur tipo di calificacion cu nos no ta ripiti aki.

Pero riba e dia mas Hulandes di aña ta parce cu esey no ta hunga un papel, pasobra riba e dia ey ningun hende ta desea di tende nada negativo, mas cu tur cos pasobra ta trata di e Rey, y diferencia di opinion politico no ta al caso riba e dia aki. Y asina mester ta tambe, pasobra e ta un di e dianan cu nos ta sinti nos Arubano y ciudadano Hulandes, unda nos ta sinti, en todo caso pa esun cu ta comparti esaki, di ta parti di algo mas grandi cu Aruba. Y den esaki e papel di Cas Real ta primordial. E popularidad di e Cas Real ta sigui grandi, a pesar di, y talbes gracia na e sucesonan negativo di ultimo añanan riba tereno politico, unda a keda demostra cu e politico cu ta kere cu e tin algo di gana cu antagonista contra representante di e Rey entre nos, ta hibando un bataya perdi, y esey ta bon noticia. No solamente pasobra e popularidad di e Rey ta grandi riba su mes, pero tambe pasobra e ta simbolisa e union di tur ciudadano den e teritorio di e pais, independiente di kico nan ta pensa di e manera di goberna, na nivel local y na nivel di Reino.

Ta pesey ta di aprecia cu actualmente, y por ta tambe pa motibo di e cosnan menos bunita di algun aña atras, awor tin mas aprecio y ta duna mas importancia na mantene e relacionnan den Reino na un nivel adecua di disposicion di colaboracion, na luga di busca conflicto caminda mester por tin solucion. Y e motibo mas importante pa aprecia e colaboracion den Reino ta hustamente pasobra nos ta na un punto hopi crucial den nos desaroyo como teritorio autonomo den Reino. Un punto unda cos por bay hopi robes, o cos ta bay drecha. Y manera tur ciudadano cu ta preocupa pa cos bay bon pa nan pais, nos ta spera y kere cu cos ta bay drecha. Pero esey no ta sucede di mes. Mester haci algo pa nos logra esey. Y esey ta exigi algun decision clave cu mester tuma. Y esun talbes mas clave ta si nos ta kere cu Aruba ta asina grandi cu cada ken cu ta desea, por coba buraco den cara di Aruba pa probecho comercial, trahando yaga enorme pa eternidad, o dañando e tiki cu nos tin di reserva natural, sin pensa cu mañan otronan tambe mester biba aki. Tin decision positivo tuma caba, manera e stop di construccion di molina na Urirama, pero tin hopi mas cu mester tuma ainda. Ainda nos ta sinti cierto ambivalencia den e manera di enfrenta e problemanan ambiental grandi, specialmente e problemanan relaciona cu procesamento di desperdicio, y e peligro grandi cu den futuro, unda cu bo biba, bo ta cerca di un dump, pasobra vocifera amor patriotico riba dia festivo, manera ayera, ta otro cu tin curashi henter aña.