E ultimo añanan Aruba no ta conoci pa celebra Aña di Rey den grandi manera na Corsou y Hulanda. Mester busca e luganan ‘oraño’: competencia di flie, mercado di purga y awe mainta e ceremonia y defile tradicional na Wilhelmina Park cu entregamento di Copa Gobernador Felipe B. Tromp, e prijs di estimulo pa hoben.
Na Superfood e mercado di purga su ganashi ta bay pa personanan menos capacita. Na Bingo tabatin hopi actividad pa muchanan, di creativo pa deportivo.
E anochi prome, diahuebs 26 april, tabatin e famoso Oranjebal organisa pa gobernador di Aruba. Gobernador Alfonso Boekhoudt a tene su discurso unda el a subraya entre otro cu nos mester percura pa tur grupo den nos comunidad ta keda inclui (aki un parti di su discurso):
“Nos reto pa e añanan nos dilanti ta pa sigui busca e coneccion cu tur grupo den nos sociedad. Ningun grupo mester keda marginalisa, segrega of exclui pa motibo cu nan ta diferente. Nos mester crea condicionnan esencial pa esey. Cu legislacion, cu transparencia y cu proceder gobernamental integro. Pero pa un comunidad duradero, inclusive y social, tin mester di mas ainda.
Gobierno no por haci esaki su so. Esaki ta exigi scogencianan propio, e disposicion di tur hende pa contribui na un Aruba miho y mas bunita, sin cu esaki ta un obligacion.
Mi ta spera cu nos tur, cada ken for di nan experiencia y expertisio, por contribui na enrikecemento di nos sociedad Arubano; na nos famia Arubano. Un contribucion activo como ciudadano, como prohimo, pero por ehempel tambe como boluntario na un di e cantidad grandi di organisacionnan boluntario, manera clubnan deportivo, clubnan di servicio of otronan cu un bon meta.”
