“Mi ta kere ta sumamente importante pa mayornan realisa con importante evita buraconan den permisonan ta. Pasobra e mucha chikito cu ta na Aruba ta depende di su mayor pa tin tur su permisonan tras di otro pa e por haya nacionalidad pa […] haya financiamento pa estudio y asina por amplia bo halanan y studia no solamente na Aruba pero tambe den exterior.”
Manera e director di e organisacion ta indica, Departamento di Integracion Maneho y Admision di Stranheronan (Dimas) ta habri pa colabora cu investigadonan riba topiconan cu lo kier investiga den un contexto academico. T’asina cu e director Kathy Paskel-Ruiz a señala cu nan ta colaborando pa basta tempo caba cu Universidad di Aruba, cual ta yuda e organisacion encarga cu admision colecta data riba e satisfaccion cu nan clientenan ta experiencia den e servicio cu nan empleadonan ta duna.
Ademas di esaki Dimas a haya alrededor di 50 studiante ‘sigur’ den e ultimo 5 pa 6 añanan, segun e directora, unda nan ta haci diferente investigacionnan pero tambe ta core stage na e organisacion cu ta otorga permisonan pa stranheronan. “Nos como organisacion tin porta habri pa studiantenan. Nos ta felicita universidad pa percura pa studiantenan siña tocante nos leynan y nos sistemanan unda nan recomendacionnan sigur ta keda tuma na serio.”
E topico aki ta surgi despues cu un investigacion tanto cualitativo como cuantitativo a keda publica — titula Becoming Aruban? — unda studiante na University College Utrecht (UCU) Nora Röders a papia cu inmigrantenan cu sea lo kier naturalisa, a naturalisa of ta den proceso pa naturalisa riba nan experiencia den nan trayectorio pa obtene nacionalidad Hulandes y tambe con sociedad Arubano ta percibi inmigrantenan, di nan punto di bista.
‘Birando Rubiano?’
E investigacion ta uza diferente teorianan pa splica dicon inmigrantenan ta motiva pa bira Hulandes, sea si nan tin un motivacion pa busca miho oportunidadnan economico, pa haya derecho di voto, ta sinti nan mes Rubiano, kier haya trabou, mas oportunidad pa biaha of ta haci esaki pa defende nan derechonan den sociedad en general. E pregunta central cu e investigacion lo kier contesta ta dicon personanan bibando na Aruba ta scoge pa bira Hulandes, en comparacion cu e motivacion splica pa parlamento Hulandes di ‘scoge pa sociedad Hulandes’.
Den nos entrevista cu e directora nos ta trece na atencion di Dimas diferente punto cu e personanan cu e investigadonan a entrevista a expresa, cual ta e aspecto cualitativo di e investigacion. Den e estudio por mira un cantidad di comentarionan negativo pa loke ta trata contacto cu Dimas y e esfera en general pa loke ta trata migrantenan na Aruba.
Sinembargo e estudio mes ta remarca cu esaki no ta representativo di loke ta pasando den comunidad, mirando cu e personanan cu nan por a haya tabata generalmente gruponan similar, ademas di e echo cu a realisa e estudio den un temporada cortico. En total a entrevista 13 personanan pa e parti cualitativo y 60 persona a yena e cuestionario pa e parti cuantitativo.
Dimas reaccionando riba esaki a duna un splicacion cu en berdad Dimas ta un di e instancianan cu ta duna conseho den caso cu un persona kier naturalisa of opta pa haya nacionalidad Hulandes, pero cu e ley di nacionalidad cu ta vigente na nos pais compara cu henter continente Mericano ta basa riba descendencia, esta Jus sanguinis, en bes di Jus soli, cual ta encera cu nacemento riba tera ta determina un persona su nacionalidad.
‘Haya nacionalidad no kiermen haya identidad Rubiano’
“Ora cu Aruba a fungi den cierto periodonan como un pais di migrante bo ta haya cu cierto personanan parti di bo sociedad despues cu nan cumpli cu rekisitonan lo kier haya e nacionalidad Hulandes. Esaki ta un escogencia, no un obligacion. Pues cada persona cu scoge pa esaki lo tin nan propio motivacion. Tin personanan cu manera menciona den e investigacion lo kier haya nacionalidad Hulandes pa nan estudio. Esaki ta algo cu lo surgi den investigacionnan.”
Riba e aspecto di identidad, e investigacion a remarca cu ningun di e participantenan a indica cu nan kier naturalisa pa bira Rubiano. Sea e personanan ta considera nan mes Rubiano y ta identifica cu e isla of no. Pero e nacionalidad mes no ta un indicacion di un persona su miembresia den sociedad, segun e investigacion. Sinembargo aplica pa naturalisacion den cierto casonan ta un reaccion riba ‘sinti Rubiano’. E sintimento aki ta fuerte specialmente pa migrantenan di generacion 1.5, cual a inmigra prome cu nan di 13 aña di edad.
Aunke segun Dimas e cantidad di peticionnan desde 2011 a baha, cual nan ta relata na e echo cu ta pidi un prueba di Hulandes y Papiamento en bes di por scoge entre Hulandes y Papiamento, Dimas ainda ta hayando nan. Loke Dimas ta remarca ta cu pa un persona por naturalisa nan historia cu permisonan ta sumamente importante. Segun sra. Paskel-Ruiz, buraconan cu un persona haya den nan permisonan ‘lo por perhudica e proceso pa naturalisa’. En caso cu tin buraconan, permisonan cu e persona a haya prome cu e buraco no ta conta, pues e termino ta cuminsa di nobo.
”Mi ta kere ta sumamente importante pa mayornan realisa con importante evita buraconan den permisonan ta”
E investigacion a remarca cu den nan entrevistanan por a mira cu generalmente mayornan ta forma un obstaculo pa nan yiunan por naturalisa na Aruba, specialmente si e persona ta menor di edad y no por provee di permisonan di su propio cuenta. Un persona di Haiti a remarca: “Mi ta haya stress pasobra basicamente si bo mayornan no tabata suficientemente inteligente pa percura pa bo status legal, e ora ey bo ta man mara. Y bo tin cu tin conexion aki pa por aplica pa un permiso y pa hay’e.”
Cu mayornan den pasado lo tabatin dificultad of no a provee pa e status legal di nan yiunan ta reconoci na Dimas. Manera nos a compronde den charla cu un trahado na Dimas, e proyecto dreamers of kast kinderen tabata un respuesta di Dimas na e manera cu anualmente mayornan ta pasa Dimas ora e yiu mester gradua, pasobra e yiunan mester di un permiso pa por ricibi nan diploma.
Segun sra. Paskel-Ruiz, “e percepcion cu Dimas a perhudica un of otro cliente por biba na final si bo mira cu bo tin 10 permiso den man, pero si bo tabatin buraconan memey bo lo mester ta consciente cu e buraconan aki por afecta bo futuro.”
Pues e directora ta conseha pa pidi permisonan na tempo, specificamente prome cu un permiso anterior caduca, generalmente 3 luna prome cu esaki caduca. Pa un trayectorio di naturalisacion segun e directora ta compronde cu un periodo di 3 luna of mas sin permiso ta un buraco. ‘Si bo tabata laat 1 dia of 2 dia e no lo afecta bo’, el a bisa.
”Mi ta kere ta sumamente importante pa mayornan realisa con importante evita buraconan den permisonan ta. Pasobra e mucha chikito cu ta na Aruba ta depende di su mayor cu ta acudi na Dimas pa tin tur su permisonan tras di otro pa e por haya nacionalidad cu a base di esey por surgi mas derechonan, entre otro, e derecho pa haya financiamento pa estudio y asina por amplia bo halanan y studia no solamente na Aruba pero tambe den exterior.”
