James Bradley Jr., e homber cu a conduci e truck den cual tabatin inmigrante ilegal cu tabata purba drenta Merca, di cual 10 a muri asfixia, a keda sentencia ayera na bida largo den prizon, den un corte federal na San Antonio, Texas.
Sr. Bradley, oriundo di Kentucky y di 61 aña di edad, a declara su mes culpabel na october pasa di ‘conspiracion’ y trafico di hende, causando nan morto.
E conductor di e truck a ricibi dos sentencia di bida largo, sin derecho di libertad condicional y cu e mester cumpli simultaneamente, segun hues federal David A. Ezra.
“Ta duel mi hopi cu esaki a pasa,” sr. Bradley a bisa den un video cu su defensornan a presenta den corte, segun e medio MySanAntonio.com. “No tin un anochi cu ta pasa sin cu mi ta rebiba henter e escena aki.”
Ademas di e sentencia, hues Ezra a confisca e truck, como tambe 5.600 dollar y un pistol caliber .38 cu a haya den e vehiculo, segun comunicado di Departamento di Husticia.
Dia 23 di juli 2017 e autoridadnan a haya 39 inmigrante den e compartimento di carga di e truck di sr. Bradley den un parkeerplaats di Walmart, den teritorio di Texas. Nan tabata biaha den pleno verano pega riba otro, sin oxigeno y na temperatura di 100 grado Farenheit. E inmigrantenan tabata bati riba e bandanan y tabata pidi ayudo durante e infernal trayecto pero e chauffeur no a para e truck.
Hopi di e sobrevivientenan, incluyendo adolescente, a ser haya cu sintoma di asfixia, deshidratacion severo y heat stroke. Ocho persona a muri den e truck y otro dos a muri den hospital,den un di e incidentenan mas mortal di contrabanda di inmigrante den historia. E inmigrantenan tabata bin di Mexico y Centro America.
Sr. Bradley na un principio a bisa cu e no tabata sa cu e inmigrantenan tabata den e trailer, pero na october aña pasa el a admiti su culpabilidad. Di e manera aki el a evita un eventual condena na pena di morto si el a keda condena den un huicio.
(fuente: Univision)
