Minister di labor, Glenbert Croes (MEP) a denuncia e echo cu funcionario di Departamento di Labor y Investigacion (DAO) a otorga 6 uitzendbureau vergunning sin su autorisacion.
E decision di e mandatario pa tuma un decision drastico contra e funcionarionan di DAO ta na consideracion actualmente. Pero e mandatario kier tuma e decision aki a base di tur e echonan.
E prome decision cu el a tuma ta revoca for di DAO e autoridad di otorga uitzendbureau vergunning.“E autoridad ey departamento di labor no tin mas y por lo pronto no ta hay’e tampoco”, el a bisa. E mandatario a cualifica esaki como un problema grandi cu DAO.
Tambe el a pidi un revision di tur e dossiernan di e seis permiso cu a wordo haci. El a institui un comision di investigacion pa asina e por haya e conclusionnan definitivo.
A base di e conclusion di e investigacion aki e lo determina kico ta bay ta su relacion como minister cu esunnan cu a tuma e decision pa otorga e permiso aki. Segun e mandatario ta mas cu un persona envolvi pa firma di e tipo di permiso aki.
E ta considera inaceptabel cu bou e maneho cu nan ta hibando como gobierno, e funcionarionan aki ta procede den apenas tres luna di duna seis uitzendbureau vergunning sin su aprobacion y conocemento como minister concerni di labor. E ta haya cu esaki ta inaceptabel y e ta un violacion di e principio di confiansa cu mester tin entre DAO y su ministerio di labor. E ta haya cu DAO tabata na altura di su maneho pa elimina e abuso nan den e sector di uitzendbureau pa cu nos trahadonan y nos leynan.
