Ayera tardi minister di Financia, Xiomara Ruiz-Maduro a haci entrega di presupuesto 2018 na parlamento. Na momento cu e conferencia di prensa a tuma luga ayera, e concepto di ley aki tabata na gabinete di gobernador pa e pone su firma. Inicialmente e intencion tabata pa e wordo entrega awe, pero a logra di haci esaki ayera mes. E fecha ultimo pa keda cla cu e tratamento di presupuesto aki den parlamento ta dia 30 di april.
E mandatario a indica cu nan a tene cuenta cu e consehonan ultimo di e organo di supervision CAft. E parti importante di nan conseho tabatin di haber cu e reduccion di gasto. Mas tanto riba e parti di inversion cu tin algun di nan cu gobierno ta ‘temporalisa’. Ya caba segun e mandatario nan a haci un ehercicio caminda 35 miyon a wordo reduci di e presupuesto 2018 compara cu esun anterior.
CAft a pidi gobierno pa e deficit riba su presupuesto 2018 keda bou di esun anterior. Esun di 2017 tabata 3.1% y esun di awor ta yega 3%. E ta un deficit di 150 miyon florin. Pais Aruba tin cu bati porta den mercado internacional pa por busca e fiansa necesario pa atende cu e compromisonan cu gobernacion di nos pais tin. Nan mester apoderacion di conseho di ministernan di reino pa e fiansa aki, y e procesonan aki ta canando caba.
Presupuesto
“Nos a cumpli cu tur locual tabata e consehonan y recomendacionnan di CAft.” E ta haya cu no tin un factor ‘sorpresa’ cu por bin acerca tocante e recomendacionnan di e organo supervision aki.
El a presenta un panorama breve di e presupuesto aki caminda e tin un nota di cambio di cual nan ta presenta e informacion cu CAft a trece 2 di maart ultimo. E presupuesto ta conoce inversion tambe specialmente riba tereno social y infrastructura pa cas social y siguridad. Tambe nan ta contempla un crecemento economico conservativo of modera di 1%. Segun e mandatario nan a cumpli cu e reduccion di gastonan di operacion di gobierno.
E mandatario a splica cu berdad den e ley di LAft (Landsverordening Aruba financieel toezicht) ta poni cu mester tin un surplus di 0.5%. Pero debi na e situacion financiero cu nan a hereda di e gobierno anterior, nan a anuncia na principio di december ultimo cu dificilmente nan por cumpli cu e normanan pa 2017. Pero tambe nan a premira cu pa 2018 tampoco.
P’esey na prome instancia nan a presenta un presupuesto cu tabatin un deficit di 190 miyon ekivalente na 3.9% di nos DGP. Ta e ora cu CAft a enfoca riba e parti di gastonan y inversion pa gobierno tene cuenta cu nan pa e presupuesto di 2018 lo por bin un tiki mas abou cu esun di 2017. Tambe nan a tene cuenta cu tabatin factor externo manera e problema di Citgo y refineria na San Nicolas cu a pone cu pais Aruba no por cumpli cu e presupuesto cabalmente, ya cu e suma cu mester drenta den caha di gobierno no a drenta.
Normanan y KB
Te ainda no a bin cambio riba e normanan cu ta poni pa 2018. Sinembargo e manera cu presupuesto 2018 a wordo traha ‘kisas e no ta cumpli cu e ley di CAft’. Pero si e ta algo cu CAft tambe ta haya cu e ta cuadra cu e realidad financiero di nos pais, segun minister di Financia.
Tocante e posibilidad di secretario di estado di asunto di Reino, Raymond Knops pa bin cu un KB pa incumplimento di e normanan di LAft, e ta haya cu e declaracion aki ta hopi prematuro. E ta kere cu e mesun mandatario Hulandes por a ripara esaki ora cu CAft a trece su rapport.
Segun e mandatario local, Hulanda no tin un caminda pa cana pa bin cu un KB riba pais Aruba, ya cu entre otro nan mes ta mira entre otro cu e supervision di CAft no a traha of ‘no a duna su fruta’. Esaki ta e punto cu gobierno ta haya cu Hulanda tambe tin cu carga responsabilidad, y no pretende cu un gobierno cu a caba sinta y cu ta asumi responsabilidad y ta busca solucion, nan ta bay ‘kap su man tambe’.
Reunion na Hulanda y compromiso
Tambe e minister a referi na e corespondencia cu nan a sostene cu e presidente actual di CAft, sr. Gradus, despues di e ultimo conseho di e organo di supervision. E mandatario a laga sa cu nan ta corespondencia nan cu tin un caracter reserva, kiermen entre su persona como minister di Financia y CAft.
“Nan no ta bira publico. Nan no ta documento pa publico.” El a laga su den su reciente reunion cu sr. Gradus esaki a bay den bon esfera. E funcionario aki tin conocemento riba financia publico y nan ta papia e mesun idioma financiero. Esaki ta contribui pa un bon reunion y compronde e esfuerso cu pais Aruba ta realisando riba e tereno aki, segun e mandatario. Den nan reunion nan a bay mas den detaye riba e contenido di e presupuesto 2018. Tambe nan a papia riba e constelacion di CAft cu ta bay conoce cambio na juli awor.
Un punto cu el a trece dilanti ta cu den e conseho di CAft ta indica cu no lo bini compensacion riba locual gobierno ta presenta. Sinembargo el a laga sa cu e punto aki no ta berdad, y nan a atende esaki cu CAft locual a keda aclaria. Tanto asina cu e organo di supervision a rectifica por escrito cu nan a compronde fout aki, ya cu e parti di compensacion ta indica tambe den e memorandum financiero/economico. Pero tin mas puntonan cu a wordo trata, pero esaki no ta accesibel pa publico, el a laga sa.
Espacio pa drecha financia publico
Gobierno ta premira cu pa 2021 nan no por yega na e surplus chikito por ta menos di loke e ley di Laft a determina inicialmente pa e aña aki. Ainda e negociacion cu Hulanda mester continua pa nan por haya e espacio di cuater aña pa sanea e deficit financiero di pais Aruba.
Sinembargo den e negociacion cu Hulanda, nan kier pa gobierno haci esfuerso pa bin cu un stabilidad financiero di su presupuesto den dos pa tres aña. Pero tambe pa yega na e 25 miyon di surplus manera tabata premira pa e aña aki. Minister Ruiz-Maduro a laga sa cu e caminda cu nan kier cana ta esun di 4 aña, manera e ta poni den e memorandum financiero/economico. E ta duna nan espacio suficiente pa por haci tur operacion necesario pa trece financia publico stabiel bek.
“Nos ta operando. Pero nos kier pa e pashent ta bibo na final. P’esey nos ta pidiendo espacio akinan. Pero tur cos ta negociacion”, asina e mandatario a declara.
E ta considera cu un espacio di dos of menos aña pa soluciona e asunto di financia publico lo resulta ‘inhumano’ pa nos pueblo. Te aworaki e prome parti di e deliberacion cu Hulanda ta mustra cu nan kier duna pais Aruba menos espacio y pa tal motibo aki gobierno di Aruba ta negoshando pa por haya un espacio mas amplia di tempo.
