Yakari Gabriel, awor studiante na Hulanda pero aña pasa ainda nos colega na Bon Dia Aruba, ta para den e final awe di House of Poets, Poetry Slam na Rotterdam.
Yakari ta e unico hende muhe cu a gana un di e competencianan e luna aki y awor ta competiendo contra e miho poetanan di Hulanda, entre otro L Deep, Dutch Poetry y M.SpokenWord.
“Mi ta haya mi mes un tiki intimida”, e ta conta ayera. “No paso mi ta e unico muhe, sino paso sociedad tin custumber di no tuma palabranan di hende muhe na serio. Hende muhe ta conoci pa ta emocional pero homber no. Pues ora un homber ta haci bon poesia, inmediatamente su palabranan tin mas peso. Paso sociedad ta condiciona homber pa no ta vulnerabel. Pues ora nan ta, e ta un poco special. Esey ta locual ta bother mi mas. Cu nan tin e upper hand.”
E poco tempo e hoben Rubiano ta na Hulanda (menos cu 1 aña) el a bira hopi activo den mundo di poesia na Hulanda y ta haci presentacion na diferente ciudad. Diadomingo ultimo el a presenta na e The Viallant Theathre na Den Haag caminda el a competi e escenario cu diferente muhenan cu a bin dilanti pa papia tocante obstaculonan di bida y feminismo. E ta conta cu esaki tabata bou invitacion di Deborah Cameron, kende a lansa su mesun talk show titula Speak2Inspire, pa trece muhenan Afrocaribense hunto y discuti nan problemanan.
‘Cera circulo di un muhe na paz’
Na Aruba Yakari tabata conoci caba entre otro como participante di Gang den Arte. El a uza e poema ‘Completamente Muhe’, traduci na Ingles, pe Poetry Slam. E tempo ey el a gana e di 3 luga na Aruba cu e poema aki. “Mi poema pa e final (awe) ta yama ‘Bastard child” y ta cera e circulo di un muhe cu a yega na cera paz cu ken e ta y di unda e ta bin.”
E ta splica cu su poemanan ta draai mas tanto rond di trauma y cosnan cu el a experiencia. “Nan ta trata di mi perspectiva di bida como no solamente un migrante, pero mama soltera, feminismo, xenophobia y odio propio.”
Publico mas agresivo
Nos ta puntra con e ta haya e publico na Hulanda. “Nan ta reacciona otro. Nan ta mas snap nan man y ta comprende e concepto. Caminda Aruba e publico ta silencioso pa mayoria di e presentacion.”
