E conflicto cu a surgi na haf di Barcadera ta resultando den daño economico pa e companianan cu ta importa y pa economia en general. Si cuerpo di aduana ta haya cu nan interes ta hustifica loke nan accion, nan mester ta hopi sigur cu esey ta asina… Esey ta asina? Nos ta bay purba contesta e pregunta aki.
Siguridad den cualkier puerto o aeropuerto a cambia bastante desde 11 di september 2001. Nos tur por experimenta esey ora nos bay biaha y mester pasa control ora nos kier bay otro pais. Tur caminda na mundo, esnan cu ta traha regla di siguridad ta consciente di e hecho cu no ta solamente e cliente, den e caso aki e pasahero, sino tambe e mesun personal di siguridad mester ta obheto di control obligatorio, pasobra nan mes tambe ta forma un factor di riesgo, cu merece debido control. Esey ta implica cu den tur area restringi, unda cierto autoridadnan ta haciendo nan trabao banda di otro, tur mester ta suheto na control debido ora nan drenta o sali di e area restringi.
E prome pregunta cu mester contesta: ken ta e autoridad cu ta encarga cu siguridad di e haf? Den e caso aki (na Barcadera) e autoridad a keda den man di Astec NV. Cu esaki ta un entidad priva no ta al caso, pasobra den e situacion bieu na haf di Playa, APA NV tambe ta un entidad priva. Kico esaki ta significa concretamente? Cu ta e entidad aki mester garantisa e reglanan di siguridad portuario na cual Aruba ta mara segun tratado internacional. Y kico e mester haci pa esey? Controla tur persona di tur entidad oficial cu mester traha den e area restringi pa cual e ta responsabel. Esey no ta conta solamente pa otro entidad (Aduana, Inmigracion, personal di empresa cu ta brinda servicio special den e area), pero e ta conta tambe pa debido control riba su propio personal. Pasobra den e negoshi aki bo no por laga ningun hende sin controla pa nan ‘cara bunita’, bo mester controla tur, pe simpel motibo cu bo no sa ta ken tin acuerdo cu delincuente eyfo, cu tin interes pa laga droga of arma, of cualkier otro asunto pasa sin detecta.
Nos por haci un comparacion cu e problemanan cu a surgi algun tempo pasa na KIA. Ayaden bo no por limita bo control na e bishitantenan, lagando afo un debido control riba e personal mes. Hasta mester controla e personal cu ta haci control, pa evita cu nan mes ta hinca den acuerdo cu hende cu ta desea di drenta cosnan no desea den e facilidad. Y manera nos a comenta algun tempo pasa den nos editorial riba e situacion na KIA: esun cu tin problema cu e tipo di control severo aki, lo mester busca un trabao unda no ta exigi e tipo di medida di siguridad aki.
E mesun cos ta conta pa haf di Barcadera. Ta cuerpo di Aduana mes a keha tocante e situacion di insiguridad cu nan ta traha aden pa motibo di e gran cantidad di persona cu ta yega cu lancha y barco principalmente for di Venezuela. Nan a exigi cu nan mester por haya arma pa sinti nan mes mas sigur, locual no mester ta un problema pasobra e ta un cuerpo uniforma cu den cierto circunstancia mester por dispone di arma. Pero esaki no ta cambia nada na entrada di e area restringi unda e duanero mester haci su trabao. E mester somete su mes na regla di control hustifica mescos cu e mesun personal di siguridad di e autoridad portuario tambe mester ta someti na control regular.
Y pa bay asina leu pa cuminsa afecta interesnan economico pa un asunto di disgusto cu bien por a regla na mesa, ta simplemente uzando un poder na un manera exagera. Si kisas e publico lesado of scuchado di noticia ta kere cu ta trata di un par di container, laga nos bisa cu di un solo empresa importador cu a notifica nos, a para mas di cuarenta container! Ta logico cu den e situacion aki no ta solamente necesario pa sinta na mesa y regla e asunto aki ‘de una vez por todas’, pero ta logico cu e empresanan y nan representacion gremial lo bay busca debido compensacion pa daño y perhuicio via corte.
Tin varios asunto unda cuerpo di Aduana ta envolvi aden cu no tin solucion pero nos no ta tende e sindicato papia nunca riba esaki. Por ehemplo, na aeropuerto unda par di miyon hende mester pasa control anualmente, te awe ta un miserabel aparato di scan tin pa tur e fluho aki. No ta straño anto cu hopi biaha no ta uza esun aparato aki tampoco y e personal ta para wak tur hende pasa bay sin controla ni un. Nos a yega di tende sindicato keha tocante e situacion idiota aki? Of nan miembronan ta contento cu nan por djis para wak sin traha? Y unda e autoridad riba Aduana a keda pa pone orden riba e cuerpo uniforma aki?
