Mi hendenan! Tempo na Hulanda no por get so act together no? Un dia ta 14 grado, e siguiente -2? Anto mi a para bira un dje hende idiota nan ey cu ta cuminsa tur combersacion cu con e tempo ta, pasobra tres aña despues sikiera algo mi mester a tuma over. Pero bon, ban papia! Ken sa e cantica ‘Djis mi mes’ di Levi Silvanie? “Den un mundo yena cu maldad mi kier ta bon, mi kier ta e cos corecto den esnan robes. Den un mundo yena cu maldad mi kier ta bon, en todo caso mi kier ser mi mes…ta du du du dab dab”
Yiu di nos ruman isla Corsou, Levi a yega di comenta cu el a skirbi e cantica ey durante un di su dianan malo na Hulanda y awo ami ta uza e cantica aki como un metodo pa sobrevivi. Podise ta e beat, e letranan, e echo cu e cantica ta na Papiamento, ken sa? E ta djis ponemi sinti cerca di cas.
Desde dia cu mi a yega Hulanda, nunca mi a sinti cu mi por ta mi mes. E diferencia cultural ta demasiado grandi. They don’t get me, I don’t get them. Como hopi otro studiante, mi tambe ta sofoca den e estilo di bida Europeo cu ta asina diferente na esun Caribense. Poco dia pasa mi a wordo invita pa bay papia na un evento yama Fem2Fem na Almere. Como semper mi a declama mi poemanan, haci poco joke, y despues coy trein bay Utrecht bek. Eventonan na Hulanda nunca a yena mi alma y te hasta ora mi ta tende bon feedback, hende ta yora den audiencia, etc. Ami djis no ta sinti nada. Mi ta keda bay unda cu nan invitami pasobra misa cu e ta mi proposito den bida, pero no semper mi ta haya algo bek.
Na Aruba, despues di poetry nights semper mi tabata sinti den un manera ‘fullfilled’. Akinan esaki no ta e caso. Den tur e invitadonan ami ta e unico cu a declama na Ingles y e unico cu a presenta poesia tambe, ta pa esey nan a invitami. E resto di e oradornan a comparti topiconan cu ta interesante pa hende muhe como entre otro libertad financiero, muhenan den politica, sigui bo soñonan, etc.. Den particular tabata tin un invitado yama Mara Michels. Mara ta run su mesun branding company y e ta enfoca riba yuda hende haya nan proposito.
Segun Mara proposito ta ora locual bo ta bon den dje, ta uni cu bo pasion y locual ta ponebo sinti bon. Unda e tres akinan ta meet, eyden bo proposito ta. Mi a tuma algun anotacion. Despues el a pasa un video di muhenan poderoso papiando tocante proposito. Entre nan e famoso Oprah cu a bisa ‘bo nunca lo yega bo proposito si bono ta autenticamente bo mes’. Bayendo bek Utrecht, mi a sinta combersa cu un di e muhenan cu tabata den audiencia.
El a bisami e ta di Corsou, e ta follow mi riba instagram y el a bin precisamente pa scucha ami y Mara papia. Mescos cumi, e tambe tabata loco pa caba di studia pa bay su isla bek. Pero den un cera di wowo 16 aña a pasa y ainda e ta na Hulanda. E di cumi cu awo si el a pensa a yega ora pa cuminsa bay bek, pasobra awo cu su 30 y pico aña e kier cuminsa biba un bida cu proposito. Sinembargo, e no ta pensa Hulanda ta e luga unda e lo haya esaki.
E ta contami cu e ta un juffrouw di scol, e ta duna economie na e grupo di 18 pa 24 aña na un MBO, sinembargo tur su studiantenan ta mustra di ta bashi paden y e no sa mas con pa motivanan. Boso sa kico mi ta kere ta e problema cu nos tur mi hendenan? Cu como sociedad semper nos ta encurasha hende pa haci uzo di nan maximo potencial, pero nunca nos no ta encurasha hende pa busca nan proposito. Pasobra e ta un berdad cu nos tur tin un proposito den bida, mas sinembargo no ta nos tur ta biba den esaki. Y kico ta pasa? Ta yen hende ta cana rond cu tur cos den bida menos felicidad. Nan ta asina pober di paden, placa ta tur locual cu nan tin. Den un sociedad capitalista, e ta mas facil ta conveniente cu ta autentico. Aminsa di bosonan, pero ami si a resolve cu en todo caso mi kier ser mi mes. Mi no kier uza mi maximo potencial sin proposito. Sino vice versa. Haci e cambio, cuminsa busca proposito, ban nos tur padilanti… Bosa cu mester por!
