Venezuela: Aumento salario minimo ta sigui fomenta inflacion

E incremento salarial decreta pa presidente Nicolas Maduro diahuebs pasa ta genera atrobe mas preocupacion cu satisfaccion. Dirigentenan empresarial y sindical ta sigura cu e aumento di e entrada integral pa 1.307.646 bolivar no ta representa ningun alivio pa e trahadonan y loke e ta haci ta pone e cuponan di trabao na riesgo, segun El Nacional ta adverti.

“E aumento aki no ta responde na e necesidadnan di e trahadonan, si tabata asina anto lo mester a ahusta esaki por lo menos na prijs di e canasta basico alimentacion, cu segun calculo di Cendas (Centro di Documentacion y Analisis Social) di federacion di maestro Venezolano, a surpasa 24 miyon bolivar na januari. E incremento aki ta solamente un contesta mal pensa di e regimen na un momento cu su nivel di aceptacion ta minimo”, Marcela Maspero, dirigente di e Union Nacional di trahado ta comenta.

Carlos Larrazabal, presidente di Fedecamaras, ta di acuerdo cu e aumento no ta beneficia ningun trahado, ya cu e poder di compra ta hopi deprimi, y a insisti cu mientras no ta tuma  medida pa lanta produccion, e crisis lo persisti.

“Atrobe no ta cumpli cu e acuerdonan di e Organisacion Internacional di Trabao, cual nan ta establece cu gobierno di e paisnan miembro, incluyendo Venezuela, mester discuti nan incremento salarial cu trahado y dunado di trabao pa hunto yega na politica economico cu por incentiva produccion y ta yuda pa preserva poder di compra.”

El a recorda cu na maart di aña pasa e salario minimo tabata na 40.638,15 bolivar y tabata yega pa cumpra 4 carton di webo (di 30) mientras cu e luna aki el a subi te na 392.646 bolivar, pero no ta alcansa ni pa cumpra un carton. Den un aña e carton di webo a subi cu 3.900%, pasando di 10.000 bolivar na maart 2017 pa 800.000 na maart 2018.

El a bisa cu a pesar di cu e salario nobo no ta yuda pa mehora e calidad di bida di e  empleadonan, e si ta afecta e empresanan. El a señala cu tin hopi industria y comercio cu no tin inventario y no ta bendiendo, pero asina mes mester sigui paga sueldo. “Na final di dia e incrementonan cu no ta bay acompaña pa otro medida economico,ta termina perhudicando e cuponan di trabao. Esaki ta loke tabata sosodiendo caba.”