(JornaldoBrasil/Infobae) –Ta parce cu na Brasil no ta yega un fin na e notorio caso di corupcion, conoci como Lava Jato, den cual a detene y enhuicia caba un cantidad di mandatario y funcionario halto di gobierno, y varios gerente di empresanan envolvi.

Den e cuadro aki polis a detene ayera e presidente di e federacion di comercio di Rio de Janeiro (Fedecomercio-RJ), Orlando Diniz, pa su supuesto participacion den e trama criminal cu a tuma luga den gobernacion di e estado. Di acuerdo cu e investigadonan, el a desvia cerca di un miyon dollar di dos entidad semi publico, liga na comercio, Senac (servicio nacional di aprendisahe comercial) y Sesc (servicio social di comercio),  pa e firma thunder assessoria empresarial, unda e ta aparece como socio administrado.

E accion hudicial ta un extension di e operacion Lava Jato, cu ta investiga e scandal di corupcion den e empresa petrolero estatal Petrobras, y cu yega na destapa otro trama den gobernacion di Rio de Janeiro, cu a afecta tur sector di administracion publico di e estado.

Segun autoridadnan, Diniz supuestamente a uza e structura,crea pa e red di ex gobernador Sergio Cabral, cu ta preso caba y tin mas di 20 caso penal pa trata ainda, pa labamento di placa.

Un di e metodonan pa desvia recurso publico tabata pa contrata funcionario ‘fantasma’ cu tabata destina na e entidadnan Sesc y Senac, di acuerdo cu polis federal.

Diniz ya a keda kita di su cargo di presidente di e entidadnan Sesc y Senac na Rio pa Tribunal Superior diHusticia (STJ), pa varios iregularidad den su desempeño.

E investigacion ta indica cu e contratacionnan fantasma a wordo haci riba solicitud di Cabral pa aumenta e cantidad di soborno cu e tabata distribui regularmente na nan operadornan mas cerca y na pariente.

Hues Marcelo Bretas, di e di 7 corte federal criminal di Rio de Janeiro, a emiti orden di prizon preventivo pa Diniz y tres otro persona implica den e red di corupcion, ademas di 10 orden di aresto pa otronan envolvi.

Autoridadnan encarga cu e caso ta bisa cu entre 2006 y 2017, e desvionan di placa publico di gobernacion di Rio a yega na por lo menos 300 miyon real (90 miyon dollar).