(Infobae/LaRepublica) – E suceso a tuma luga diaranson marduga na region di Arequipa, na sur di Peru, ora un bus cu pasahero a bolter y cay den un abismo. Por lo menos 44 persona a perde nan bida y otro 10 a keda herida.
Autoridadnan ta pensa cu un maniobra malo di e conductor lo a origina e accidente. E tragedia a sucede na altura di kilometro 780 di caretera Pan Americano Sur, cerca di e localidad di Camaná.
General Walter Ortiz, hefe di polis na Arequipa, a ofrece un reporte cu e cifra di victima fatal y a añadi cu e lista di pasahero tabatin registra 45 persona, loke ta indica un iregularidad di parti di e empresa. Varios ambulance a yega na e zona pa yuda cu e heridonan, aunke ya tabata realisa e traslado pa hospital cu ayudo di helicopter. E hefe di polis di caretera, coronel Dino Escudero, a informa cu e accidente a sucede ora e bus a despista y a bolter.
“Ta parce mi cu e ta debi nan un accion incorecto. E conductor a sali di e caminda den un curva y a cay den e abismo. Anto, definitivamente, o nan a corta su paso, o el a pega soño”, Jacqueline Choque, hefe di e oficina di Defensa Nacional y Defensa Civil di gobierno regional di Arequipa, a comenta.
E imprudencia di e chauffeurnan y exceso di velocidad ta e principal causanan di accidente di trafico na Peru, segun polis y fiscalia. Peru ta registra anualmente un indice halto di accidente cu bus di empresanan informal, o cu ta den situacion financiero precario, cu mal mantenemento como consecuencia. Na januari di e aña aki a tuma luga e accidente mas grandi di Peru den ultimo cuarenta aña, unda 52 persona a muri ora un bus a cay den abismo, cerca di capital Lima. Mas di 2.500 persona a muri den accidente di trafico na Peru na 2016, segun cifra oficial. No a publica e datonan di 2017 ainda.
