E hefe di e mision di lucha contra corupcion di Organisacion di Estadonan Americano (OEA) na Honduras, Juan Jiménez Mayor, a anuncia sorpresivamente su renuncia na e cargo pa falta di apoyo di e secretario general, Luis Almagro, y di “herment pa cumpli cu su trabao.”
“Cu gran pesar y despues di un profundo reflexion mi ta comunica mi renuncia di e cargo,”e abogado Peruano a bisa riba Twitter. El a instala e asina yama mision di apoyo contra corupcion y impunidad na Honduras (MACCIH) na februari 2016.
Juan F Jimenez Mayor@JuaJimenezMayor
E renuncia a bin despues cu diahuebs pasa a publica na Honduras un nota manda pa Almagro na e presidente Hondureño, Juan Orlando Hernández, den cual e ta afirma e necesidad di “fortalece e funcionamento di MACCIH,” pasobra “e no tabata capaz di duna resultado” pa loke ta e lucha contra corupcion.
Sinembargo, Jiménez a lamenta den un comunicado, den cual e ta confirma su renuncia, cu Almagro a nenga di ricibie na augustus 2017 y cu dia 30 di januari ultimo tampoco el a ricibie ora el a biaha exclusivamente pa Washington pa duna Almagro un informe di e trabao di e mision y di e menasanan cu e tabata ricibi despues di denuncia e red di diputado.
Jiménez y e fiscal general, Oscar Chinchilla, a anuncia den rueda di prensa di 11 di december 2017 cu nan a acusa cinco diputado di a ricibi fondo di gobierno pa proyectonan social pero cu nan a desvia esakinan pa nan cuenta personal.
Den su renuncia, Jiménez a lamenta cu Congreso Hondureño a modifica dia 18 di januari e ley di presupuesto cu ta señala cu e apertura di huicio no ta continua te cu e Tribunal Superior di Cuenta (TSE) conclui e auditoria di e fondonan, despues di cual husticia a dicidi di e proceso contra e diputadonan.
