Un comision di diferente expertonan riba tereno di salud ta bay reformula e ley di AruBig. Esaki a wordo palabra den un reunion cu minister di Salubridad Publico, Dangui Oduber, segun e relato cu nos a ricibi di su parti.
E comision cu a wordo institui ta consisti di diferente expertonan riba tereno di salud cu tin e tarea pa conseha minister di Salubridad con pa reformula e ley di AruBIG pa por amplia e registracion di BIG, dunando chens na nos studiantenan cu a completa nan estudio den region, Europa y/of Merca pa por traha den nos sistema di cuido pa asina aporta na un miho calidad di cuido pa nos ciudadanonan.
Expertonan den e comision lo duna nan conseho na minister Oduber dentro di un termino di 3 luna. E comision ya menciona tin tambe como tarea pa conseha e minister ariba e miho forma con pa institui e asina yama kwaliteitsinstituut cual lo ta responsabel pa acredita diploma di esunnan trahando den e sector di cuido.
Manera a yega di menciona anteriormente, Corsou ya caba tin e ley aki di BIG adapta na e situacion di studiantenan cu a finalisa nan studio den exterior. Minister Oduber ta compromete su mes na sigui informa nos pueblo di e progreso di diferente puntonan di accion riba agenda pa cu mehoracion di nos calidad di cuido medico, e relato ta clausura.
