Durante un conferencia di prensa ayera mainta prome minister Evelyn Wever-Croes a atende topico di medida cu a wordo tuma pa stop incentiva fiscal den area di San Nicolas.
Esaki manera conoci tabata pasobra Organisation for Economic Co-operation and Development (OECD) tabata menasando di pone Aruba riba blacklist si no cambia e incentiva fiscal cu di manera inhusto ta duna cierto negoshinan bentaha riba otro.
Prome minister a subraya cu e maneho aki nunca tabata hancra den ley, pues te hasta esunnan cu a haya esaki tabata preocupa pa loke ta trata e status di esaki. Segun prome minister, e mandatario di Financia anterior Angel Bermudez tambe tabata plania pa kita e maneho aki pero ‘no a comunica esaki debidamente’.
Aunke e mandatario no a haya opcion pa elimina esaki, sra. Wever-Croes a expresa cu gobierno lo ta buscando maneranan ‘miho’ cu lo por hinca incentiva den otro pa beneficia desaroyo economico na San Nicolas sin afecta Aruba su chens pa haya inversionistanan di afo por medio di no cumpli cu regulacionnan internacional.
Sinembargo e medida aki lo keda conta pa esunnan cu a haya esaki te cu aña 2020.
