Sindicato SADA kier reacciona riba e situacion rond di e convenant cu a wordo firma despues di un proceso largo na unda diferente departamento, minister di Financia y tambe Landsbemiddelaar, y SADA mes tabata envolvi.

Den su comunicado, SADA ta cuminsa bisa textualmente asina: “Laga nos cuminsa na bisa cu nos di SADA no kier wordo envolvi den ningun wega politico y mucho menos wordo pinta como muchanan manda di ningun partido politico. Nos ta para pa nos miembronan independiente di e signatura di e gobierno. Esey nos a bin ta mustra bon cla den e manera cu SADA a opera e ultimo añanan.”

“Un biaha mas, e convenant ta e resultado di e trabou extensivo di un comision consisti di DRH, leiding di Douane y SADA, cu a wordo instala por medio di un Ministeriële Beschikking na december 2016. E trabou di e comision a resulta den un acuerdo cu a wordo poni den convenant cu a wordo firma pa e Minister di Financia anterior, director di Aduana, Landsbemiddelaar y SADA despues di a wordo aproba den ministerraad. Nos ta corda cu durante e proceso aki SADA a bay den accion na varios ocasion, na unda cu varios parlamentario di MEP, entre nan e actual minister Xiomara Ruiz-Maduro (MEP), a expresa nan sosten na nos e tempo ey.

Pa bin bek riba e situacion actual, nos a manda un carta caba dia 5 di januari 2018 na e minister di Financia sr. Ruiz-Maduro(MEP) tocante e convenant. Lamentablemente nos no haya ningun contesta riba esaki, locual nos ta haya ta un falta di respet na nos miembronan cu nos ta representa. Despues cu e luna di januari a pasa tabata claro cu Land Aruba no cumpli cu e convenant y e derechonan di nos miembronan a wordo viola, a yama un reunion dia 1 di februari 2018, cu nos miembronan. Eynan a dicidi di bolbe manda un carta y entrega esey na bestuurkantoor e mesun dia.

Na bestuurskantoor e minister no kier a baha pa tuma e carta pero solamente kier a ricibi e president di sindicato y a nenga di laga otro miembro di directiva drenta su oficina. E president di sindicato a informa e minister cu asina pe no ta un reunion oficial, debi cu no por sinta cu e minister y su consehero sin directiva di SADA. E minister insisti ya cu ta e ta dicidi y a ignora e peticion di e president di sindicato pa laga sikiera un miembro di directiva ta presente. Pa sorpresa di president, e minister a bira sarcastico y a burla di e posicion di sindicato despues di a lesa e carta cu SADA a bin entrega.

El a bisa, cu si kier bay corte por bay corte numa, pero lo perde. E arogancia y falta di respet aki nos no a conoce di e minister anterior. Tabata tin desacuerdonan y a yega di bay den accion varios biaha, pero semper e trato tabata cu respet pa otro.

Nos ta puntra nos mes ta con nos lo wordo trata den añanan binidero cu un minister cu ta mustra cu e no tin respet pa nos sindicato y asina pa e Cuerpo di Aduana en general.

Mas nos ta lamenta locual ta e declaracion di e minister durante su rueda di prensa tocante e situacion, cual pa SADA tabata completamente for di sla. Ta comosifuera e minister ta kere cu ainda e ta den campaña y no kier atende asuntonan cu ta cay bou di responsabilidad di un minister.

Pa finalisa mester pone enfasis cu den e carta cu nos a entrega dia 1 februari 2018, nos no a haci ningun tipo di peticion pa reunion cu e mandatario, pero mas bien den e carta nos a bisa e minister ‘cla y raspa’ cu e deadline pa Land Aruba confirma cu nan lo cumpli cu e convenant ta vence 8 di februari 2018. Dado caso no a bin un contesta por escrito, no ta keda nada cu nos otro opcion di busca locual ta e derechonan di nos miembronan dilanti mesa berde.”