Ultimamente Bureau Leerplicht a reuni cu cabesantenan di tur scol na Aruba pa discuti varios puntonan di preocupacion cu nan a trece dilanti. E parti di no manda muchanan scol hopi biaha ta pa via di problemanan social na cas segun Bureau Burean Leerplicht. Esaki y algun otro punto mas manera ampliacion den edad den ley di Burean Leerplicht y partimento di multa na mayornan a wordo discuti.

Bureau Leerplicht tin seis Bureau Leerplicht ambtenaar, un trahado social y dos hende di administracion cu ta tuma yamadanan di telefon. Tur melding ta bay via administracion. Kenneth Jong, beleidsfunctionaris y coordinador na Bureau Burean Leerplicht ta conta nos cu dia 1 di februari nan tabata tin un reunion cu tur e cabesantenan di tur scol primario na Aruba. E scolnan a pidi e reunion aki cu Bureau Burean Leerplicht pa asina trece algun punto di preocupacion pa dilanti.

Den cuadro di e caso lamentabel di Roshandroh y Eugene aña pasa, comunidad tabata puntra entre otro unda Bureau Leerplicht a keda y pa kico no tabata tin control na e scol mirando cu e muchanan tabata tin basta tempo sin bay scol. Nos a puntra Bureau Leerplicht kico a bay robes akinan y si algo por a wordo haci. “Loke a pasa den pasado den casonan lamentabel, e ta e trahamento entre e cabesantenan y Bureau Bureau Leerplicht. Nos ta actua ora nan meld un mucha via un formulario oficial. Tanten esaki no pasa, un Bureau Leerplicht ambtenaar no por haci mucho”, sr. Jong ta splica.

Den nan sistema, no tabata tin un melding externo pa locual ta e caso di e dos criaturanan. Pa e motibo aki tambe e encuentro cu e cabesantenan recientemente tabata hopi importante y necesario pa repasa algun punto cu mester bin cambio/ahustacion.

Ampliacion di edad den ley di Bureau Leerplicht
Den e encuentro aki tabata tin presente e trahado social di Bureau Bureau Leerplicht Lilian de Freitas, un Bureau Leerplicht ambtenaar Franklin Priest, personal di administracion y sr. Jong mes. Den e encuentro aki a bin basta pregunta y preocupacionnan di parti di e cabesantenan. Diferente articulonan di e ley di Bureau Leerplicht a wordo parti na tur hende anto a splica nan con e proceso ta hinca den otro.

Entre edadnan 4 cu 16 aña un mucha mester cumpli cu e ley di Bureau Leerplicht y mester ta na scol, anto esaki tambe a wordo discuti cu lo mester wordo ahusta. “E ampliacion di e edad tambe a wordo discuti pasobra den ley ta para cu a escoge te 16 aña mirando cu eynan bo lo a caba un educacion primario, cu diploma den man. Anto bo lo por subi cualkier mercado y traha. Na Hulanda por ehempel nan a amplia esaki caba pa guia e muchanan te ora cu nan haya diploma den nan man. E parti aki tambe nos ta bay trece cerca minister”, sr. Jong ta splica Bon Dia.

Cambio den formulario pa meld
Den ley ta para cu si un mucha tin tanto dia sin bay scol, e cabesante mes por tuma decision pa contact Bureau Bureau Leerplicht, y si tin mas cu dies dia sin bay scol, mester bin un formulario na Bureau Leerplicht pa nan por actua. Ta asina cu cada Bureau Leerplicht ambtenaar tin 15/17 scol bao di nan pa basta aña caba pa asina por tin miho contacto cu otro segun sr. Jong.

Den e encuentro cu e cabesantenan, a wordo treci dilanti cu tur cos mester bay via e formulario pa meld y ta tarea di scol pa duna algun informacion/datos di e mucha y con leu scol mes a trata e problema aki. Depende con pisa e caso ta, tin biaha ta e scol, e mayor of trahado social ta yama, of tin otro instancianan ta cay den wega tambe. Conhuntamente cu trahadonan social y otro Bureau Leerplicht ambtenaar, ta haciendo cambio den e formulario di meld pa haci esaki mas corto segun sr. Jong. Te aworaki nan tin un formulario pa meld cu e cabesantenan a trece dilanti cu no ta trahando optimalmente y aki ta unda e scol mester haci basicamente tur cos. Awor e meta ta pa haci e formulario mas simpel pa meld pa ora e yega Bureau Leerplicht pa nan bay e scol y sigui busca mas datos necesario. E formulario ta mas o menos tres pagina cual awor lo mester bira un solo pagina unda e scol por marca e problemanan y tin menos trabao pa nan, como tambe motiva nan pa mas lihe manda un melding pa por actua segun sr. Jong.

Multa pa mayornan
Locual tambe a bin dilanti ta e parti di multa. Den ley ta para cu ambtenaarnan di Bureau Bureau Leerplicht tin e autoridad pa skirbi multa, pero te ainda e parti aki no ta regla segun sr. Jong.

Nan mester bay un curso di BOA (Buitengewoon Opsporingsambtenaar) pa nan por haya e autoridad aki oficialmente, y cabesantenan a laga sa cu lo ta bon pa regla esaki mesora. Peticionnan a wordo manda na minister di enseñansa anterior y tambe lo bay na e minister nobo awor, pa asina poco poco por pone placa un banda pa bin cu e curso aki pa e ambtenaarnan di Bureau Leerplicht por subi caya, wak problemanan y duna multa na mayornan cu no ta cumpli cu ley di Bureau Leerplicht. Di otro banda, algo cu Bureau Leerplicht a trece dilanti cerca e cabesantenan, ta cu hopi biaha ta problemanan social na cas ta motibo pa kico e muchanan no ta wordo manda scol y si bay pone multa mester pensa con facil e multa lo por wordo paga pa un famia pasando den problemanan social fastioso.

“Tur esey nos mester pone den nos pensamento riba con e proceso di e multa lo mester wordo hinca den otro. Den articulo 10 di ley ta para cu tin multa contrario loke algun cabesantenan of mayornan ta pensa. E minister te aworaki ta autorisa pa pone un multa entre 250 – 2500 florin. Nos mester traha henter un dossier completo y mand’e pa minister si nos mester yega riba casonan realmente extremo”, sr. Jong ta bisa.

E cabesantenan ta di acuerdo cu mester tin algo cu bo mester por haci no necesariamente pa spanta e mayornan, pero pa yuda cu e cumplimento di regla y laga nan pensa cu cos no por sigui asina. Den un siguiente edicion nos lo sigui riba nos entrevista cu sr. Jong riba otro puntonan cu a wordo discuti y kico tur ta na caminda pa keda ahusta.