Den e presentacion recientemente na Universidad di Aruba riba ‘accesibilidad den un Aruba envelhecendo’ docente Mieke Droog ta mustra cu mas hende ta indica cu nan ta exclui for di nos comunidad como cu nan no por participa mas pa motibo di falta di accesibilidad.
Den Bon Dia di 3 di februari nos a elabora riba e topico aki caba. Motibo grandi ta cu nos populacion ta birando mas bieu y asina tin mas hende cu mester ayudo. Sinembargo riba diferente tereno ta falta ayudo sea e no ta adecua y tampoco accesibel na esunnan cu mester. Docente universitario Droog ta menciona un investigacion (2016 Ponson) unda a puntra personanan pa cualifica accesibilidad na Aruba riba un scala di 0 pa 10. E resultado averahe tabata 2,5, cual no ta mustra bon pa nos isla. Siguramente den e contexto cu actualmente nos tin 7000 persona cu limitacion caba y e cifra aki ta creciendo como cu nos populacion manera menciona ta envelhecendo.
Tambe nos tin mas y mas personanan cu malesanan cronico. Por ehempel mas cu 11% di nos populacion ta sufri di diabetes. Complicacionnan por ta problema cu cana (te hasta amputacion pa motibo di mal circulacion di sanger) y tambe problema cu bista (diabetische retinopathie). Docente Droog ta bisa cu asina cu un persona ta drenta un situacion unda ta dependiente, hopi ta cay den un isolacion. Por ehempel na Aruba core auto ta algo masha importante pa por participa den comunidad y mantene contactonan social. Pero ora personanan no por core auto mas nan ta cay den isolacion pasobra no por haci compras mas unda ta topa hende, no por bay entieronan, etc.
Un otro factor ta cu nos pais tin hopi inmigrante. Nan tambe tin problema di isolacion y falta di ayudo di famia como cu nan famia no ta keda na Aruba. “Nan ta bin bay” asina sra. Droog a ripara. Un otro desaroyo cu na prome instante no ta mustra tin algo di haber cu e topico aki, ta e airco. Antes hende ta laga nan cas habri pa biento pasa pero awor nan ta cera cas y tambe pa motibo di siguridad. Esaki ta haci cu mas hende ta sinti nan mes nan so y isola. “Asina e comunidad a bira mas cera.”
Pero tambe den cuido por mira un falta di accesibilidad sea cu e dunadonan di cuido no tin mucho tempo pa socialisa cu nan clientenan. E servicio ta sufri di falta di tempo y personanan limita hopi biaha ta sinti cu no ta wordo tuma na serio.
Pa motibo di esey sra. Droog ta haci un yamada pa cuminsa haci mas esfuerso pa ‘inclui’ personanan cu limitacion. Tambe e ta pone enfasis riba prevencion. “Momento cu e personanan ta drenta den e situacion, e ora mayoria ta ripara cu no por participa mas manera antes.” Mientras tin hopi cu Aruba por haci pa evita e situacion aki y mehora e accesibilidad di personanan cu limitacion. E ta menciona cu por tuma accion riba 8 tereno: educacion; conscientisacion riba inclusion; respet y cuido pa otro; pone riba agenda politico; leynan y control; colaboracion; determina un strategia y creatividad.
E ta menciona entre otro pa cuminsa siña na scol e importancia di accesibilidad pa tur hende y no solamente esun cu no tin limitacion. Pa cuminsa siña mucha, hoben, pero tambe full e comunidad cu mester anda cu respet y no por exclui personanan. Por trece personanan jong y bieu hunto pa yuda otro. Sra. Droog ta menciona tambe pa bin cu mas transportacion pagabel y adecua pa rolstoel. Tambe e ta papia di introduci cuido special, 24 ora y unda tin mas enfasis riba prevencion. Aruba tambe mester ratifica y implementa e tratado internacional di derechonan di personanan cu limitacion di Nacionnan Uni. Gobierno aki por kita invoerrechten (impuesto) riba recursonan necesario pa personanan cu limitacion. Y tambe adapta infrastructura y haci espacio publico mas accesibel. “Mester bin cu un strategia unda tur ta colabora, fundacionnan, gobierno, enseñansa.” Esaki no ta yuda nos hende local so, docente universitario ta enfatisa: “Nos turistanan tambe ta birando mas bieu, pues nan tambe por probecha di dje.”
