Te dia 8 di februari awor, sindicato di cuerpo di Duana (SADA) a duna gobierno pa haya un contesta formal riba un carta cu e presidente di SADA, Edward Maduro a entrega ayera na minister Xiomara Maduro. Den e carta aki ta poni entre otro puntonan cu den caso cu gobierno no ta honra e convenio salarial cu a keda firma pa personal di duana, SADA ta bay corte.

Ayera mainta despues di un deliberacion, miembronan di SADA a dicidi di vocifera nan mal contento dilanti di bestuurskantoor. Sindicalista Maduro a declara na Bon Dia Aruba cu e punto principal ta cu te dia di awe gobierno no a honra e convenio salarial cu a keda firma for di juni aña pasa. E ta haya cu a pesar cu e actual gobierno tin un par di luna ta goberna, nan punto di bista ta cu ‘gobierno ta un continuacion’.

El a bisa cu dia 8 di januari nan a sinta cu minister Maduro, kende ta encarga cu departamento di Duana, caminda SADA a entreg’e e copia di e convenio salarial. Tambe nan a puntra si e mandatario a tuma nota di e convenio aki. Sinembargo e presidente di SADA ta haya cu loke a pone nan miembronan disgusta ta e falta di comunicacion. Nan ta compronde si cu e situacion aki tin su proceso.

E sindicalista ta haya cu un simpel e-mail cu SADA por a haya riba e tratamento di nan peticion caminda e mandatario por a bisa nan cu e ta ocupa cu esaki, por a evita cu nan miembronan a dicidi di pone trabou abou. El a declara cu su coleganan ta den un incertidumbre y SADA tambe.

Considerando cu e mandatario ta pasando un kebrante di salud, e no a baha pa ricibi e carta dilanti di bestuurskantoor. Pero si a pidi pa un miembro so di e directiva di SADA, den e caso aki su presidente, por a subi na su oficina pa entrega e carta. Sinembargo sindicalista Maduro a bisa cu den e reunion aki nan no a bay den detaye riba asunto di convenio salarial y nan a mantene e reunion breve, ya cu no tabata e momento adecuado. Ademas e kier pa e asunto aki wordo papia cu presencia di mas delegadonan di SADA den cuadro di transparencia y comunicacion habri cu nan miembronan. A pesar cu e charla aki a bay den un esfera hopi positivo, ainda e situacion aki no a wordo resolvi y e incertidumbre ta keda.

Aworaki SADA ta keda pendiente di e reaccion por escrito di e mandatario riba nan carta entrega ayera, pa asina por convoca un reunion cu nan miembronan pa atende cu e reaccion di e minister. Presidente di SADA a laga sa cu e accion aki no tin nada di haber cu politica su tras, ya cu semper nan a percura di haya solucion na mesa y den e ultimo dos añanan cu e ta presidi di e sindicato, den varios ocasion SADA a sali afo pa mustra nan mal contento. “No ta un cuestion cu aworaki diripiente nos ta tuma cierto accionnan”, presidente di SADA a declara na e matutino aki.