Parlamentario, Arthur Dowers reaccionando riba minister di husticia su declaracionnan tocante Interpol, a expresa cu e mandatario mester orienta su mes riba e manera con gobierno ta traha relaciona cu reglamentonan di presupuesto. “E mandatario tin di evita di wordo mal informa y manipula pa personanan cu tin mala fe den organisacionnan di husticia pa asina e no bira un marioneta di su spin doctor.”
Manera nos a publica anteriormente, mandatario di husticia, Andin Bikker a trece dilanti cu lo sigui trabounan pa institui un agencia di Interpol na Aruba. Esaki den cuadro cu e deseonan cu e actual alto comisario di Cuerpo Policial a expresa anteriormente pa por lidera un instituto asina ki. Sinembargo e mandatario a critica e mandatario di husticia anterior, sr. Dowers pa a laga un instellingsbesluit (decreto institucional) den concepto unda a delega cierto tareanan cu ta cay bou otro departamentonan pa Interpol.
Aunke sr. Dowers no a tuma nota di sr. Bikker su declaracion specifico, pa loke ta trata e financiamento e parlamentario, a expresa na e matutino aki cu a splica na e mandatario actual e medionan cu ta disponibel pa financia esaki. “Na momento cu bo lanta un departamento nobo bo tin pasonan cu bo por tuma pa financia esaki cu fondonan di mas di 4 mil florin. Semper ta posibel den proceso di traspaso pa haya fondonan den presupuesto supletorio, den caso aki paso e presupuesto a wordo traha caba.”
Es mas, e parlamentario a expresa cu e personanan cu lo a cay bou e departamento aki lo ta persona cu ‘por lo pronto’ ta personanan cu ta traha den gobierno caba, pues no lo afecta trahadonan su pan. Alabes esaki kiermen segun e parlamentario cu no lo mester delega un presupuesto supletorio na e personanan aki, simplemente cu lo laga nan cay bou e departamento cu lo wordo lanta. Riba e punto aki, sr. Bikker a expresa anteriormente cu lo ta sperando aviso di Departamento di Recurso Humano (DRH). Sinembargo esaki no ta indicacion cu e mandatario lo ta haciendo loke e parlamentario ta splica.
Loke e parlamentario a sigui splica ta cu lo por delinea e gastonan pa e departamento nobo aki den e presupuesto di aña 2018, pa asina percura cu e por wordo lanta. Esaki den combinacion cu fondonan cu lo por haya via otro metodonan, segun sr. Dowers.
“Pero loke mi a nota ta cu e minister te hasta prome cu el a bira minister ta asumi cu loke e ta bisa lo bira realidad. Den e mesun manera aki e minister a expresa den pasado cu lo bin un korpschef nobo prome cu fin di aña, despues prome cu februari. Esaki ta mustra cu e meneer aki no sa di loke e ta papia.”
“Ora cu bo lanta un departamento nobo y bo sali di gobierno, e ta logico cu e proximo gobierno lo tin cu pone e fondonan aki den e presupuesto nobo. Pero mescos cu sr. Oduber ta kere cu sr. Sevinger mester keda goberna su cartera, mi ta haya cu minister Bikker lo mester orienta su mes riba e manera con gobierno ta traha.”
