Recientemente Minister di Transporte, Comunicacion y Sector Primario, Chris Romero, a wordo poni na altura cu e aerolinea PAWA di Republica Dominicana, a haya un suspension operacional di 90 dia.
E suspension aki a wordo imponi pa e Hunta di Aviacion Civil na Republica Dominicana, pa motibo cu e aerolinea no ta cumpliendo debidamente cu nan compromisonan financiero na dicho pais. E mandatario a laga sa na Bon Dia Aruba cu e problema di e compania aereo aki tin di haber directamente cu e decision di e Hunta di Aviacion Civil na Republica Dominicana, ya cu akinan na Aruba e compania PAWA si a cumpli debidamente cu nan compromisonan economico.
Impacto turismo
Tin diferente factor cu por tin su impacto riba nos sector turistico. E hecho cu PAWA no lo por bula pa 90 dia ta traduci den un tension y incertidumbre pa tur esnan cu ta biahando cu e aerolinea aki pa Aruba. E tension politico cu Venezuela tin como consecuencia cu e aerolinea nan Laser y Albatros haya nan obliga di disminui nan vuelonan pa nos pais. Y tambe mester considera e instabilidad reinante cu Insel Air ta bibando, unda cu un biaha mas nan tin algun dia caba imposibilita pa bula. Tur esaki ta crea un situacion caminda por papia di un disminucion significativo di trafico turistico pa nos isla.
Analisando tur e acontecimento nan ya menciona, minister Romero y su ekipo di consehero, conhuntamente cu Minister di Turismo, Dangui Oduber, ta sondeando e posibilidad nan cu tin pa por yega na un solucion. Actualmente ta den combersacion cu otro aerolinea nan pa mira te na unda nan lo por yega na cubri e cantidad di vuelo cu a keda cancela den e ultimo dianan aki.
Logicamente acontecimento nan asina no ta algo cu por wordo premira, cual ta haci cu e ta bira un situacion cu tin un grado di urgencia cerca gobierno di Aruba, asina e mandatario ta bisa. Minister Romero tin atencion absoluto pa cu e retonan nobo cu a surgi den aviacion di nos pais y pronto lo bin cu solucionnan factibel pa cu e problematica aki.
Comunidad Dominicana
Pero di otro banda ta existi un preocupacion cerca e comunidad Dominicana na Aruba, ya cu PAWA Dominicana cu ta e compania aereo bandera di nan pais, actualmente no ta operando debi na e sancion di e Hunta di Aviacion Civil na Republica Dominicana.
Presidente di Fundacion Dominicana Arubanse Juan Pablo Duarte, Winston Tavarez a biba di cerca e situacion aki, ya cu e tabata un di e grupo grandi di pasaheronan di Aruba y Corsou cu a keda pega na aeropuerto Las Americas na Sto. Domingo. Finalmente despues di varios dianan di stress sin cu nan no por a tende mucho cos for di e compania PAWA, e mesun Hunta di Aviacion Civil na Republica Dominicana a chapter un avion cu a trece e grupo aki di mas cu 100 pasaheronan na Aruba y Corsou.
Sr. Tavarez a declara na e matutino aki cu e preocupacion cu e comunidad Dominicana na Aruba tin ta cu awor pa bay na Rep. Dominicana nan mester biaha via Colombia y Panama. Tambe via Miami, pero e via aki ta accesibel pa e Dominicano cu ta nacionalisa Hulandes of esunnan cu tin visa di Merca. Pero e costo di e ticket ta resulta mas caro y nan biahe mas largo.
