‘AZV mester por siña y cambia pa evita casonan asina’
No por ta asina cu nos ta biba den un pais desaroya y cuido medico riba nivel personal ta asina atrasa’, famia Leonard ta expresa na Bon Dia despues di perde un familiar den lucha contra cancer. E famia ta haya pa loke ta trata e servicio brinda pa profesionalnan y tambe e tempo cu ta tarda pa haya cuido tin hopi pa desea ainda.
Famia Leonard a perde un ruman homber aña pasa. Nan a dicidi di bin dilanti pa conta nan storia riba con e procedura cu nan ruman a sigui. Di wordo diagnostica cu cancer terminal te na su momento di fayecimento cual a trece hopi pregunta pa e famia pa loke ta trata e sistema di cuido medico na Aruba.
Nos a pidi AZV di nan banda pa duna un reaccion, pero e organo a cita cu nan no por bay den detaye den casonan ni ora ta trata despues di un fayecimento pasobra empleadonan mester wanta nan mes na secresia medico. Vocero di AZV Solange Tchong a recomenda pa e famia cana nan caminda via e canalnan prescribi na AZV mes of por medio di Inspeccion di Salud Publico pa cualkier critica wordo tuma den consideracion.
Sra. Tchong a subraya cu AZV semper ta habri pa critica constructivo y p’esey pa 17 aña largo ta avisando personanan pa acudi cerca nan ora tin cualkier puntonan cu nan lo kier aclaracion riba dje.
‘Bataya pa haya cuido medico’
Aunke e famia ta den proceso pa bay tuma contacto cu e instancianan oficial pa loke ta trata e puntonan cu segun nan por a bay miho den e situacion cu nan ruman a pasa den dje, un di e rumannan di e difunto– Seraida Leonard– ta splica dicon a dicidi di bin dilanti. Ora ta trata di AZV y cuido medico hopi persona tin miedo di ‘bringa un organisacion grandi’ ora no ta di acuerdo cu cierto aspectonan di cuido medico riba nos isla, segun e famia.
E storia cu e famia hunto a conta Bon Dia ta detaya un bataya constante pa por haya cuido cu ‘ta trata pashent como persona y no un number’. E friccionnan a cuminsa ora pa un tempo largo e difunto tabata busca un segundo opinion medico despues cu dokternan a constata cu tur cos ta bon cu ne– esaki despues di keda pa basta tempo riba lista di espera. Segun e famia, pa un periodo di 5 luna– di september te februari– mester a warda cu verwijsbrief den man pa wordo sinta dilanti un specialista. Pero pa wordo diagnostica a tarda mas largo cu esaki.
Pero mirando e situacion cu a haya su mes den dje, e famia a dicidi di manda e difunto na Venezuela pa por wordo diagnostica mas rapidamente. Eynan a constata cu e tabatin cancer di tripa. Ora a bin bek Aruba e dokter a keda sorprendi citando cu el a weita e difunto den bon estado na Aruba, segun e famia.
Ora cu e cancer a plama te den higra y wesonan mester a bay opera cu tanto chemotherapie como radioterapia despues cu dokternan na Aruba a constata por medio di un radiografia cu lo mester wordo opera den weso tambe. Pero segun e famia, e dokter durante henter e procedura aki tabatin e actitud di constantemente corda e difunto cu ‘e lo bay muri pues e no ta wak e importancia di sigui tratamento’.
“Nos como famia tabata sa claro cu e no lo bay biba un bida largo despues. Nos no ta bin dilanti tampoco pa desea cu e lo bin bek. Pero pa nos e ta keda cu si lo a haya un trato mas humano por a bay sosega riba un miho manera.”
Diferencia entre Colombia y Aruba
Despues di algun tempo pa haci e operacionnan di lomba cu tambe tabata necesario pa via di e manera con e cancer a yega te na e wesonan, mester a bay Colombia pa opera. Ora cu e famia a keda hunto cu e difunto pa mas cu 2 luna na Colombia, nan a expresa cu nan a nota di biaha e diferencia den e cuido cu ta wordo duna na cada persona individualmente. “Nan a zorg pa e haya un psikiatra pa papia cu ne y te hasta un pastoor. Pero mas aleu aunke e dokter na Colombia tabata bis’e cu e tin un cancer agresivo, nan tabata bis’e tur loke lo bay haci cu ne. Esaki compara cu Aruba unda poco informacion ta wordo duna y e atencion ta minimo.”
AZV den pasado a yega di declara na e matutino aki caba cu e cuido cu ta wordo ofreci na Aruba no por wordo compara na cuido duna den paisnan mas grandi, pa via di e tamaño di industria di cuido di un pais chikito compara cu un pais grandi.
Sinembargo tur 3 ruman a concorda cu considerando loke ta wordo paga den primanan di AZV, nan no ta haya cu ta duna suficiente atencion riba e calidad di cuido cu cada persona ta haya.
Durante su estadia na Colombia, e difunto a wordo ofreci pa profesionalnan di e pais pa haci tanto e radioterapia como e chemotherapie conhuntamente pa no gasta tempo. Pero e oncologo cu a haci e testnan na Aruba no kier a bay di acuerdo segun e famia y a pidi pa manda e difunto bek na Aruba pa nan haci e terapianan ki nan mes. “Nan a bisa nos cu e dokternan na Colombia kier placa so. Djey nan a pidi pa e wordo manda bek Aruba.”
Protocol versus deseo di famia
Mientras e difunto tabata na Colombia, e famia a expresa cu su ruman tabata mustra señalnan di ta mehorando poco. Pero e mediconan na Colombia a subraya cu mester haci lo mas hopi posibel cu rapidez pa percura cu e progreso no wordo perdi. Pero ora e famia tabata den contacto cu AZV nan a expresa segun e famia cu mester warda pa un otro persona wordo hiba Colombia riba air ambulance pasobra manda un air ambulance directamente ta mucho caro.
Prome cu a yega Aruba segun e famia, mediconan a prescribi un dosis di morfina pa percura pa e dolor no mester cay mucho pisa pa e difunto. Despues di yega bek mediconan na Aruba a pidi pa redobla e cantidad di morfina cu e pashent tabata hayando. Esaki al contrario na loke e dokternan na Colombia a explicitamente delinea na e famia– pa no hisa e nivel di morfina. Den consulta cu e dokternan na Aruba, e rason pa esaki tabata segun e famia cu ta prefera cu e ta ‘suf’ cu sufri dolor.
Pero e famia no tabata kier a bay di acuerdo cu esaki, pues a pidi pa baha e morfina bek. Esaki a wordo nenga pasobra ‘segun protocol ta prefera pa tuma e opcion aki AZV a conta nos’. Den e periodo cu tabata riba e dosis redobla di morfina e famia a subraya cu te hasta na hospital tabata laga e cuminda pa e difunto come riba mesa dilanti dje, mientras cu e ni por a move su curpa.
‘No por trata caso personal a base di stipulacion general’
“Profesionalnan di cuido tin cu tin empatia. No por ta asina cu segun protocol ta prefera pa laga hende muri mientras cu ta trata di cuido di salud di cada persona. No por trata un caso personal a base di stipulacionnan general manera protocol di un organisacion.”
E famia ta spera cu e sistema di cuido medico na Aruba lo tene mas cuenta cu personanan pero tambe e famia di personanan ora di tuma decision cu lo por afecta nan.
Tumando nota di e diferente casonan cu a surgi e ultimo añanan, e famia a expresa cu ‘e ta dificil ora bo tin cu bringa cu un organisacion grandi pa por haya un cuido adecua. Nos ta kere cu AZV mester por siña y cambia pa evita e casonan aki’.
