E documento unda segun gobierno di Aruba na e encuentro un par di siman pasa Venezuela a priminti di bay firma, keto bay ta keda sin firme di e pais Latino America. Y poco poco esaki lo tin su consecuencianan pa e islanan den Reino Caribense.
Asina ta mustra cu por lo pronto lo no bin un solucion pa e ceramento di frontera cu poco poco ta creando mas problema pa cierto sectornan comercial. Manera e fruterianan chikito (lesa mas riba pagina 3 di e edicion aki) pero tambe e aerolineanan manera nos Aruba Airlines. Gabinete Wever-Croes ta bisa cu nan ta trahando riba solucionnan pa e situacion di fruta y berdura y aerolineanan pero kico concreto no ta cla ainda. Fraccion di AVP su peticion manera por lesa aki, pa gabinete bay parlamento pa duna un splicacion riba e situacion ainda no a wordo honra.
Na Corsou prome minister Eugene Rhuggenaath a urgi consulado general di Venezuela eynan pa presenta na su oficina pa duna un splicacion dicon gobierno di Venezuela te ainda no a firma e documento unda riba 12 di januari a yega na cierto acuerdonan.
Ayera a cuminsa e conferencia di embahadornan di region Latino America y Caribe na Hulanda. Unda nos minister Plenipotenciario tambe tabata presente. Den e relato cu el a manda e ta bisa cu secretario di estado Hulandes pa Asuntonan di Reino tambe a menciona cu e paisnan den Reino ta hopi liga na otro. E desaroyonan na Venezuela y e efecto di esaki riba e paisnan den Reino Caribense ta mustra ‘hopi cla’ segun e secretario cu e cooperacion entre e paisnan ta era necesario. Venezuela mes a indica cu no kier firma nada tanten cu Europa a imponi sancion riba nan.
E potret ta di e reunion riba 12 di januari entre e representantenan di e islanan, Hulanda y Venezuela unda e yega na e documento cu palabracionnan.
