Minister di Husticia Andin Bikker ta confirma na Bon Dia cu lo sigui cu e proyecto pa institui un oficina di Interpol na Aruba.
Aña pasa den un entrevista exclusivo cu Bon Dia, Dolfi Richardson a expresa su deseo pa por traha den un instituto di ‘counter terrorism’ na Aruba mirando desaroyonan rond mundo. Sinembargo pa loke ta trata e lantamento di e instituto no a bin mucho claridad desde cu e alto comisario a anuncia su inclinacion pa e reto nobo. Bon Dia a puntra e mandatario awor riba e situacion. E ta splica cu ora el a tuma mando di ministerio di husticia, el a tuma nota di e trabou haci ‘den pura’ di gobierno anterior pa institui un oficina di Interpol riba nos isla.
Segun e mandatario, e gobierno anterior y na e momento demisionario a tuma un decision pa lanta un organisacion di Interpol– cual ya ta existi na Hulanda y Corsou– sin haci e huiswerk necesario pa haci esaki di bon forma. “Despues di mi mes a haci poco huiswerk pa orienta riba kico e reto nobo cu alto comisario tabatin inclinacion pe ta encera, mi a tuma nota cu e organisacion cu gobierno demisionario kier a cuminsa cu ne tabata encera hopi mas cu solamente tareanan di Interpol. Esaki al contrario na e situacion di e agencianan na Corsou y Hulanda.”
Lo sigui cu lanta un agencia di Interpol na Aruba
Interpol como instituto ta encarga cu trece mas colaboracion entre organisacionnan policial rond mundo pa asina combati crimen internacional y terorismo. Loke e organisacion ta boga pe ta pa paisnan traha hunto riba combatimento y investigacion di crimen cu ta afecta mas cu un pais.
Segun sr. Bikker, e organisacion di Interpol cu a keda describi pa e mandatario anterior den concepto cu un decreto institucional (instellingsbesluit)– lo a encera duna hopi tareanan na e agencia di Interpol aki cu ya caba ta wordo haci pa otro institutonan cu ta existi caba. “Den e direccion ey nos no kier bay.”
P’esey e minister a expresa di si kier sigui cu e concepto di e agencia di Interpol pero wanta e tareanan di e agencia na asuntonan di Interpol solamente. Actualmente ta sperando un conseho di Departamento di Recurso Humano pa por sigui cu e trabou pa lanta e institucion. Subrayando e importancia di e instituto aki, sr. Bikker a duna ehempel di Corsou cu den december ultimo via nan agencia di Interpol a institui un sistema conecta cu e red di Interpol ora di controla na fronteranan di Corsou.
“Esaki ta trece un miho siguridad pa por controla si na nivel internacional tin personanan indesea cu lo kier drenta nos pais. Mi intencion ta pa sigui cu esaki pero pa laga e agencia concentra riba tareanan di counterterrorism y pa link sistemanan di Interpol hunto cu Aruba.”
Sr. Bikker a subraya e importancia di esaki por medio di splica cu colega mandatario di husticia na Corsou a indica na su persona cu hopi persona cu ta purba nan suerte na Corsou despues di no logra ta bay e ora ey na purba drenta Aruba. “Pasobra nos no tin comunicacion debido entre otro e personanan ki kisas ta logra pasa mey mey di buraconan den sistema. Mi intencion ta pa despues di studia e base legal por bin na un acuerdo cu Corsou pa comparti informacion.”
