Bon Dia a sinta cu tres mayor representante di Ouder Commissie Colegio Arubano (OCCA) pa asina dialoga riba e punto di bista di mayor na con ta bayendo na Colegio Arubano despues di un temporada di cambio y poco turbulencia. E mayornan ta enfatisa cu e punto di mas importante ta keda pa alumnonan cu caba e scol finalisa esaki bon y logra locual nan a bin haci na e scol. Sinembargo, nan ta un poco preocupa cu e aña aki e resultado di examen tambe ta bay ta uno desapuntante manera aña pasa.
”E resultado di examen di aña pasa tabata demasiado malo, pues pa nos ultimamente e manera cu nos ta midi con cos ta bayendo na scol ta kico ta refleha riba nos yiu; por ehempel, si e muchanan kier bay scol tur dia y si nan ta contento con cos ta bayendo. Pero tambe sin laga afo, locual ta sumamente importante, si bo yiu caba e scol y si e ta algo cu a bay bon anto a haya bon resultado ta e motibo pakico nos manera mayor a bini hunto pa yuda cu esaki.” Sr. Ivo Dongen, Presidente di OCCA ta splica. Tur grupo di mayor sigur tin diferente preocupacion por ehempel concerni renobacion fisico di e scol pero segun OCCA, e resultado di examen ta hopi mas importante pa nan.
Den cuadro cu cambio di rector na Colegio Arubano y si esaki anto otro situacion fastioso por a hunga un rol den e resultado di examen, Bon Dia a puntra OCCA si nan ta haya cu tabata necesario pa busca un persona di afo pa bin tuma e funcion di rector pa locual nan ta contesta: ”Tin diferente opinion tocante esaki entre nos manera mayor tambe, y si bo wak den general den e grupo chikito, nos ta spera di por representa henter e grupo di mayornan, pero den e grupo di maneho cu nos tin, nos ta pensa sinembargo cu e trabao di un rector na Colegio, cual ta un scol hopi grandi, ta un desafio basta enorme. No ta unda cu ta bo por haya un persona cu e cualificacion necesario pa e funcion aki”
Si tin caminda cu mester di cambio, e mester keda obhetivo
OCCA ta sigui splica cu ta importante pa compronde cu si tin algun caminda cu mester bin cambio, pa esaki keda obhetivo y no bira nada personal. Den otro palabra, OCA ta splica cu no lo tribi di tuma un paso pa haci algo si esaki ta bay afecta un miembro di famia of algun otro tipo di relacion si e persona encarga tuma su decisionnan a base di motibonan personal.
Nan ta agrega cu tin hende cu ta bisa cu en berdad tin maestro akinan, tin hende cu sa di Enseñansa y tin hopi candidato akinan pero cu pa nan tin hopi mas rekisito envolvi den e procedura di kies un rector pa Colegio Arubano. ”Bo mester ta un persona cu sa di Enseñansa, pero tambe un persona cu por maneha un organisacion. No tin mucho compania na Aruba cu tin tanto hende aden. Pa bo maneha 130 maestro y 1,700 studiante bo mester sa bon kico bo ta haci den e ramo di maneho” , Sr. Dongen ta bisa.
Mester di un bon team; 1 solo persona no por haci tur cos
Mayornan ta un poco preocupa di con cosnan ta bayendo na Colegio Arubano ultimamente y kier pa cos cuminsa cambia pero nan ta splica cu ta imposibel pa un solo persona haci esaki riba su mes y maneha henter e scol. ”Nos ta compronde cu en berdad tin hende cu conoce e scol y tin hopi aña eynan anto cu a traha duro y kier balora esey pero finalmente, nos ta akinan pa e educacion di nos yiunan y no pa complace tur e docentenan. Nos kier pa e muchanan logra y papiando for di e punto di bista di un mayor, e felicidad di un docente ta bin na di dos luga den e caso aki” , sr. Dongen a splica.
Sr. Dongen ta agrega cu awe ora cu e cana na Colegio e ta mira e mesun hendenan local, e mesun borchinan, mosaiconan y tur otro cosnan cu ainda t’ey desde aña 1980 cu e tabata studia na e scol. ”Si bo bisa, no, duna mi un hende cu tabata t’ey tur e añanan ey, lo bo haya un persona cu sa esey so y aki 20 aña ora mi yiu cuminsa haya yiu, nada ainda no lo cambia.”
Segun OCCA, e nivel di comunicacion entre e scol y mayornan tambe mester di poco mehoracion. ”Fuera di cosnan manera Anochi pa mayor, resultado di Rapport ta cosnan cu nos semper ta na altura di dje pero cosnan realmente cosnan cu ta sosode na scol mes nos ta tende mas tanto di nos yiunan y no for di scol mes. Actualmente tin hopi cambio positivo pero sigur cu tempo nos por miho”
