Na tur esunnan cu ta sostene maldad, tur esunnan cu ta promove maldad y ta aplaudi cada biaha cu tin algo robes cu ta bay fout, lo ta bon si nan por join tambe e banda positivo y di husticia y duna informacion caminda cu nan tin. Hopi hende ta papia cu nan tin tur informacion, unda tur cos ta bay fout. Nan tin tur solucion e ora ta bon pa comparti e informacion y solucion cu tin y ta haci e trabou di husticia mas efectivo.
Biniendo cu leynan
Ta kere tambe cu lo bay cambia cierto leynan, pero ta tuma su tempo pasobra hopi biaha ora cu hende papia cu tin cu cambia ley pasobra nan no ta efectivo, ta cambia nan a base di desaroyonan den sociedad y cambionan ta mira den comunidad, Minister Dowers a indica. Esey ta pasa tur caminda na mundo y na momento cu 9/11 a tuma luga, a bin un gran cantidad di ley contra terorismo. Prome cu esey no tabata tin necesidad of miho bisa a sinti e necesidad. Mesun cos ta pasa den sociedad di Aruba, segun algun persona ta mira cierto cosnan cu ta cambia, tambe ta adapta leynan. Ta biniendo cu leynan cu lo bay tin consecuencianan basta devastador, pa personanan cu ta ocupa cu crimen caminda cu nan por perde hopi mas cu nan ta perde na e momentonan aki. Nan keda pendiente pa esey. Esey ta na caminda.
Unidad di polis adicional
Pa loke ta trata e atake riba caya, a pone diferente unidad di polis adicional riba caya, riba diferente dia. A prepara, ta train y sigui duna training adicional pa nan por actua hopi lihe na momento cu tin cualkier incidente. E resultado di esaki ta hopi efectivo, si no ta mira mas y mas persona ta wordo deteni na momento cu nan ta moviendo riba caya y ta wordo cera y cosnan ilegal ta wordo kita for di nan. Tin un grupo specifico cu a mira ta opera e ultimo dianan aki tambe riba nos pais. Ta un grupo cu ta bin for di Latino America. Por mira cu tin algun persona cu ta ocupa nan mes cu crimen, atraco y intento di atraco. Na varios ocasion a purba y no a logra. Pero si ta importante pa esunnan cu ta sostene nan, pa nan ta consciente cu na momento cu ta pone bo cas of bo apartamento cu bo tin na disposicion di hendenan cu ta ilegal, ta algo castigabel. Te na e momentonan aki nunca despues di introduccion di ley aki, el a wordo uza.
“Ta haci apelacion na Ministerio Publico pa bay wak mas di cerca con ta pone e ley aki den funcion, di manera cu ta bay haci investigacion riba esunnan cu ta ocupa nan mes cu facilita ilegal y personanan cu ta bin di otro parti pa keda ilegal aki, consecuentemente e hendenan aki ta bay over, sea drenta den negoshinan di droga of di bendemento di cosnan ilicito of cu nan ta bay atraca hende cu e ora ta coy e criminal, ta coy esun cu ta facilita e criminal y e castigo no ta mucho halto,” segun Minister Dowers. Pero awor a bira tempo pa hisa e castigonan tambe a esunnan cu ta facilita e criminalnan.
Tin biaha ta importante pa e accion t’ey rapido na momento cu tin un aviso, etc. Segun minister Dowers, tin un grupo di persona cu a keda deteni. No ta asina cu nan no ta wordo deteni. Nan ta wordo deteni hopi lihe, despues cu nan comete un crimen of haci un intento.
